IFFI 2024: 'पटकथा कशी विकावी याचे तंत्र माहिती असणे आवश्यक'; शरीक पटेलांनी सिनेनिर्मितीबद्दल दिला गुरुमंत्र

Shariq Patel IFFI 2024 The Art of Selling Your Script Master Class

मिलिंद म्हाडगुत

पणजी: कोणताही चित्रपट निर्माण करताना वा दिग्दर्शन करताना पटकथेचा अभ्यास करणे आवश्यक असते, असे प्रतिपादन सिनेनिर्माते-दिग्दर्शक तथा लेखक शरीक पटेल यांनी मनोरंजन संस्थेने खास गोमंतकीय सिनेकर्मींकरता आयोजित केलेल्या ‘मास्टर क्लास’मध्ये केले. ते ‘आर्ट ऑफ सेलिंग युवर स्क्रिप्ट’ याविषयावर बोलत होते.

लेखकाने फक्त पटकथा लिहिली म्हणून होत नाही तर तिचे मार्केटिंग कसे करावे याची माहितीही लेखकाला असावी लागते. सर्वात महत्त्वाचे म्हणजे लेखकाला आपली पटकथा सशक्त आहे याचा आत्मविश्वास असायला हवा. हा आत्मविश्वासच तुम्हाला यशाच्या शिखरावर नेऊ शकतो. त्याचबरोबर पटकथा निर्मात्याला कशी विकावी याचे तंत्र माहिती असणे आवश्यक असते. मात्र, कोणत्याही परिस्थितीत लेखकाने जिद्द सोडता कामा नये, असा सल्ला पटेल यांनी दिला.

‘ओटीटी’बद्दल बोलताना पटेल यांनी ‘ओटीटी’वर आपली पटकथा देताना ती संपूर्ण द्यावी लागते. निर्माता वा दिग्दर्शकाला ही पटकथा देताना त्यातील बारकावे अधोरेखित करावे लागतात. पटकथा ही कोणत्याही निर्मितीची मूळ असल्यामुळे ती लिहिताना सर्व दृष्टीने विचार करावा लागतो. खासकरून सुरुवात आणि शेवट प्रभावी झाल्यास निर्मिती यादगार ठरू शकते, अशी अनेक चित्रपटांची उदाहरणे दिली.

सुरुवातीला मनोरंजन संस्थेच्या उपाध्यक्ष आमदार दिलायला लोबो यांनी ‘मास्टर क्लास’चे रितसर उद्‌घाटन केले. ही गोमंतकीय सिनेकर्मींकरता चांगली संधी आहे. याचा फायदा त्यांना त्यांच्या निर्मितीत होऊ शकेल, अशी आशा लोबो यांनी व्यक्त केली. स्वागत व प्रास्ताविक या ‘मास्टर क्लास’चे निमंत्रक शर्मद रायतुरकर यांनी केले.

गोमंतकीय सिनेकर्मींनी मांडल्या समस्या

यावेळी उपस्थित असलेल्या अनेक गोमंतकीय सिनेकर्मींनी त्यांना सतावणाऱ्या समस्या पटेल यांच्यासमोर मांडल्या. कोकणी चित्रपटांना मार्केट नाही इथपासून ‘ओटीटी’वर चित्रपट निर्मितीचा प्रस्ताव दिल्यास ते गाजलेल्या कलाकारांची मागणी करतात, अशा समस्या मांडल्या.

एका महिला कलाकाराने तर झी स्टुडिओजने गोमंतकीय सिनेकलाकारांना संधी द्यायला हवी, अशी मागणी केली. यावर बोलताना पटेल यांनी धीर न सोडता स्थानिक सिनेकलाकारांनी सर्व माध्यमांवर प्रयत्न करायला हवेत, असे सांगितले.