पणजी: तृणमूल काँग्रेसला (TMC) गोवा विधानसभा निवडणुकीत हार पत्करावी लागली आहे. पक्षाला गोव्यात एकही आमदार निवडून आणता आला नाही. तृणमूलच्या प्रचारासाठी प्रशांत किशोर यांच्या IPAC कंपनीचे लोक अनेक महिन्यांपासून गोव्यात ठाण मांडून बसले होते. मात्र त्याचा तृणमूलला काहीच फायदा झालेला दिसत नाही.

तृणमूलने गोव्यात 26 जागा लढवल्या होत्या. यातील 15 जागांवर त्यांना रिव्हॉल्यूशनरी गोवन्सच्या उमेदवारांना मिळालेल्या मतांपेक्षाही कमी मते मिळाली आहेत. पक्षाने 4 जागांवर दूसरा क्रमांक तर 3 जागांवर तिसरा क्रमांक गाठला. दोन जागांवर लोकांनी टीएमसीपेक्षा NOTA (वरीलपैकी काहीही नाही) ला जास्त मते दिली.

अनेक राज्यात IPAC ने आपली जादू दाखवली आहे. मात्र गोव्यात (Goa) त्यांच्या पदरी निराशाच पडली. गोवेकरांनी तृणमूलला पूर्णपणे नाकारले आहे. गोवा विधानसभा निवडणूक तृणमूल काँग्रेस आणि महाराष्ट्रवादी गोमंतक पार्टीने एकत्रित लढवली होती. तृणमूलच्या (TMC) हाती काहीही लागले नसले तरी मगो पक्षाने 2 जागा जिंकल्या. निकालानंतर त्यांनी तृणमूलची साथ सोडत भाजपला (BJP) जवळ केले आहे.