गोव्यातील राजकीय घडामोडींना दिवसेंदिवस वेग येतो आहे. गोव्यात प्रचार आणि सभा सुरू झाल्या आहे. काल गोव्यात प्रचारादरम्यान दिल्लीचे मुख्यमंत्री अरविंद केजरीवाल (Arvind kejriwal) म्हणाले की, गोवा हे प्रथम दर्जाचे राज्य (Goa First Class State) आहे, परंतु येथे तृतीय दर्जाचे नेते आहेत. यावेळी केजरीवाल यांनी राज्यातील जनतेला भ्रष्टाचारमुक्त सरकारची हमी गोव्यातील जनतेला दिली.

गोव्यातील विधानसभा निवडणुकीला (Goa Assembly Election) अवघा काही अवधी शिल्लक राहिला आहे. सर्वच पक्ष प्रचारात गुंग झाले आहेत आणि जोमाने प्रचार करत आहेत. दिल्लीचे मुख्यमंत्री अरविंद केजरीवालही गोव्यातील राजकारणामध्ये मागे नाहीत. यावेळी विधानसभा निवडणुकीत सर्व 40 जागा लढवण्याची घोषणा करणाऱ्या केजरीवाल यांनी सोमवारी मोठे विधान केले. आणि त्याआधी त्यांनी गोव्यातील जनतेला अनेक आश्वासनही दिले.

अरविंद केजरीवाल पुढे म्हणाले, "मला वाटते की गोव्यात अधिक चांगल्या पात्र राजकारण्यांची गरज आहे. गेल्या 60 वर्षांत या पक्षांनी तुम्हाला भ्रष्टाचाराशिवाय काय दिले आहे? असा सवाल करत, आमचा पक्ष गोव्यात पहिले भ्रष्टाचारमुक्त सरकार स्थापन करेल, असे आश्वासन केजरीवालांनी गोमंतकीयांना दिले.

विशेष म्हणजे गोव्यात विधानसभा निवडणुकीच्या जवळपास दोन महिने आधीच अनेक नेत्यांचा भ्रमनिरास होतांना दिसत आहे. त्यामुळे पक्षांतरण वाढले आहे. मंगळवारी भाजपचे आमदार कार्लोस आल्मेडा यांनी आमदारकी सोडून पक्ष सोडला. याआधी लुइझिन फालेरो, रवी नाईक, अॅलेक्सो रेजिनाल्डो या सर्व कॉंग्रेस नेत्यांनी पक्षाला रामराम ठोकला. त्यानंतर गोवा फॉरवर्ड पार्टीचे जयेश साळगावकर, अपक्ष आमदार रोहन खवंटे आणि भाजपच्या आमदार अलिना साल्डाणा यांनीही राजीनामा दिला. त्यामुळे गोव्यात राजकीय नेत्यांच्या पक्षांतराचा निवडणूकीवर काय परिणाम दिसून येईल औत्सुक्याचे असणार असणार आहे.