आगामी काळात पाच राज्यांमध्ये निवडणुका होणार आहेत. यामध्ये गोवा राज्याचाही समावेश आहे. याच पाश्वभूमीवर शिवसेना नेते आणि महाराष्ट्र सरकारमधील कॅबिनेट मंत्री आदित्य ठाकरे आज गोवा दौऱ्यावर आहेत. यावेळी त्यांनी गोव्याचे मुख्यमंत्री प्रमोद सावंत यांच्या साखळी मतदारसंघात प्रचारसभा घेत राज्यातील भाजप सरकारवर हल्लाबोल केला. गोव्याचं आणि महाराष्ट्राचं एक वेगळं नातं असल्याचं देखील त्यांनी यावेळी सांगितले. (Aditya Thackerays General Assembly in Sanquelim Constituency for Goa Elections 2022)

ते म्हणाले, ''गोव्यातील भाजप सरकारने कोरोना काळात जनतेला वाऱ्यावर सोडलं. मात्र शिवसेना गोवेकरांना प्राधान्य देणार आहे. त्याचबरोबर महाराष्ट्राचं मॉडेल घेऊन शिवसेना गोव्यात आली आहे. आणि आम्ही हे मॉडेल गोव्यात यशस्वी करुन दाखवणार आहोत. त्याचबरोबर गोव्यातील पर्यटन वाढविण्यासाठी आम्ही सातत्याने काम करणार आहोत. तसेच गोव्याच्या उज्ज्वल भविष्यासाठी शिवसेना निवडणुकीच्या रिंगणात उतरली आहे. गोव्यात फाई स्टार हॉटेल आले, विकास झाला, मात्र सर्व सामान्य गोवेकरांच्या घरात पाणी पोहोचले नाही.''