Who Is Aseefa Bhutto To Become First Lady In Pakistan: पाकिस्तानमध्ये देशातील फर्स्ट लेडीची प्रथा बदलणार आहे. एका ऐतिहासिक निर्णयात राष्ट्रपती आसिफ झरदारी यांनी त्यांची 31 वर्षीय मुलगी असिफा भुट्टो हिला औपचारिकपणे देशाच्या प्रथम महिलेचा दर्जा देण्याचा निर्णय घेतला आहे. फर्स्ट लेडीचा दर्जा सामान्यतः राष्ट्रपतींच्या पत्नीला जातो, परंतु 2007 मध्ये त्यांच्या पत्नी आणि पाकिस्तानच्या माजी पंतप्रधान बेनझीर भुट्टो यांची हत्या झाली. भुट्टो यांच्या मृत्यूनंतर झरदारी यांनी पुनर्विवाह केला नाही आणि ते पहिल्यांदा राष्ट्रपती झाले तेव्हा त्यांच्या पहिल्या कार्यकाळातही (2008 ते 2013) देशाच्या फर्स्ट लेडीचे पद रिक्त होते.
दरम्यान, रविवारी, 68 वर्षीय झरदारी यांनी देशाचे 14 वे राष्ट्रपती म्हणून शपथ घेतली. इस्लामाबादमधील राष्ट्रपती भवनात झालेल्या शपथविधी समारंभात झरदारी यांच्यासोबत त्यांची धाकटी मुलगी असिफाही होती. ARY न्यूजच्या वृत्तानुसार, सूत्रांनी दावा केला आहे की, राष्ट्रपती झरदारी यांनी असिफा भुट्टो यांना पाकिस्तानच्या फर्स्ट लेडीचा दर्जा देण्याचा निर्णय घेतला आहे. झरदारी यांची मोठी मुलगी बख्तावर भुट्टो झरदारी यांनी रविवारी सोशल मीडिया प्लॅटफॉर्म 'X' वर एका पोस्टमध्ये असिफाला टॅग केले.
ट्विटमध्ये असे लिहिले आहे की, "राष्ट्रपती आसिफ झरदारी यांना त्यांच्या न्यायालयीन सुनावणीत पाठिंबा देण्यापासून ते तुरुंगातून सुटकेसाठी लढा देण्यापर्यंत - आता पाकिस्तानची फर्स्ट लेडी म्हणून त्यांच्यासोबत उभी आहे." बख्तावर यांनी असिफाचे आभार मानून पोस्टचा समारोप केला. भुट्टो कुटुंबाच्या नेतृत्वाखालील पाकिस्तान पीपल्स पक्ष (पीपीपी) देखील झरदारींच्या निर्णयाला पुष्टी देत असल्याचे दिसते.
ARY न्यूजने सूत्रांच्या हवाल्याने म्हटले आहे की, फर्स्ट लेडी या प्रतिष्ठित पदावर असिफाची नियुक्ती करण्याचे हे ऐतिहासिक पाऊल देशाच्या राजकीय इतिहासातील एक महत्त्वाचा अध्याय आहे. अधिकृत घोषणेनंतर, असिफाला फर्स्ट लेडीनुसार 'प्रोटोकॉल' आणि विशेषाधिकार दिले जातील. 8 फेब्रुवारीच्या निवडणुकीसाठी पीपीपीच्या प्रचारात असिफाचा सक्रिय सहभाग होता आणि तिने तिचा भाऊ बिलावल भुट्टो झरदारी यांच्या समर्थनार्थ अनेक जाहीर सभाही घेतल्या होत्या. निवडणुकीत बिलावल भुट्टो हे त्यांच्या पक्षाचे पंतप्रधानपदाचे उमेदवार होते.
दरम्यान, 30 नोव्हेंबर 2020 रोजी मुलतानमध्ये पीपीपीच्या रॅलीत सहभागी होऊन असिफाने आपला राजकीय प्रवास सुरु केला. पाकिस्तानप्रमाणेच परदेशातही अशी अनेक उदाहरणे आहेत की जेव्हा राष्ट्रपतींना पत्नी नसेल तर त्यांनी त्यांच्या मुली, बहिणी आणि भाचींनाही 'फर्स्ट लेडी'चा दर्जा दिला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.