थायलंड हा गांजाची लागवड, विक्री आणि वापर कायदेशीर करणारा आशियातील पहिला देश ठरला आहे. जानेवारी 2022 पासून यावर वाटाघाटी सुरु होत्या, ज्याला आता सरकारने ग्रीन सिग्नल दिला आहे. सरकारने बंदी घातलेल्या प्रतिबंधित ड्रग्‍सच्या यादीतून गांजा काढून टाकला आहे. स्थानिक मीडिया रिपोर्ट्सनुसार, सरकार देशभरात एक दशलक्ष गांजाच्या बिया पाठवण्याची योजना आखत आहे. (Thailand Becomes The First Asian Country To Decriminalize Marijuana)

गांजा थायलंडला कोरोनापासून वाचवेल?

मुख्यतः पर्यटनावर (Tourism) अवलंबून असलेले देश, जसे की थायलंड, कोरोना महामारीमुळे त्रस्त झाले आहेत. अशा परिस्थितीत थायलंड सरकार हे नुकसान भरुन काढण्यासाठी विविध योजनांवर काम करत असून गांजाबाबतचा सरकारचा (Government) हा निर्णयही त्यालाच एक कडी असल्याचे तज्ज्ञांचे मत आहे. साथीच्या रोगापूर्वी, थायलंडच्या (Thailand) जीडीपी आणि रोजगारामध्ये पर्यटनाचा 20 टक्के वाटा होता.

आरोग्यमंत्र्यांना गांजापासून अर्थव्यवस्थेत सुधारणा अपेक्षित

गांजा उत्पादनांची व्यावसायिक विक्री आणि वैयक्तिक लागवड कायदेशीर करण्याचा निर्णय थायलंड सरकारने घेतला आहे. कारण ते नगदी पीक आहे. आरोग्य मंत्री अनुतिन चरणवीरकुल म्हणाले की, थायलंडचे सुमारे एक तृतीयांश कामगार अजूनही कृषी (Agriculture) क्षेत्रात कार्यरत आहेत, परंतु देशाला आता गांजा उद्योग देखील विकसित करायचा आहे. गांजा उद्योगाचे मूल्य 2 अब्ज डॉलर्सच्या पुढे घेऊन जाण्याची आम्हाला आपेक्षा आहे.

नव्या कायद्यात तरतूद

थाई लोक त्यांच्या घरात गांजाचे रोप देखील वाढवू शकतात. परंतु त्याचा वापर फक्त आणि फक्त वैद्यकीय हेतूसाठी करण्यात यावा. शिवाय, सार्वजनिक ठिकाणी धूम्रपान करण्यास मनाई करण्यात आली आहे. असे काही करताना आढळल्यास 60 हजार रुपयांपर्यंत दंड आणि तीन महिने कारावास होऊ शकतो.