Protest Against Hijab: इराणमध्ये गेल्या काही दिवसांपासून हिजाबला विरोध सुरू झाला असून त्याविरोधात मोठे आंदोलन पेटले आहे. या आंदोलनात आता शाळकरी विद्यार्थिनीही उतरल्या आहेत. दरम्यान, पोलिसांनीही आंदोलकांवरील कारवाई गतिमान केली असून आत्तापर्यंत या आंदोलनात 154 आंदोलकांचा मृत्यू झाला आहे.

सोशल मीडियात व्हायरल झालेल्या एका व्हिडिओत इराणमधील विद्यार्थिनी इराणचे राष्ट्रापती इब्राहिम रईस यांचे फोटो तुडवताना दिसत आहेत. राष्ट्रपती रईसी हे नव्या शैक्षणिक वर्षाच्या प्रारंभप्रसंगी तेहरानच्या अल जाहरा विद्यापीठात बोलताना म्हणाले की, शत्रुंना वाटते की, ते विद्यापीठात त्यांचा हेतू साध्य करतील. पण आपले शिक्षक, विद्यार्थी जागरूक असल्याची त्यांना कल्पना नाही. आंदोलकांचे कारस्थान यशस्वी होणार नाही. या भाषणानंतर विद्यार्थिनींनी त्यांच्या विरोधात घोषणाबाजी केल्याचे समजते.

सुरक्षा यंत्रणांकडून शैक्षणिक संस्थांवर कारवाई केली जात आहे. पोलिसांकडून आंदोलकांवर गोळ्या झाडल्या जात आहेत, अश्रुधुराच्या नळकांड्याचा वापरही केला जात आहे. त्यात कुर्दिस्तानची राजधानी सानंदज येथे पोलिसांनी एका कार ड्रायव्हरला गोळी मारली आहे. तसेच इस्लामिक रिव्होल्युशनरी गार्ड कॉर्प्स (IRGC) च्या आंदोलकांचाही गोळीबारात मृत्यू झाला आहे.

इराणमधील मानवाधिकार समुहाच्या माहितीनुसार पोलिस कारवाईत सानंदज येथील एका शाळेतील दोन शिक्षकही गंभीर जखमी झाले आहेत. 16 सप्टेंबरपासून हे हिजाबविरोधी आंदोलन इराणमध्ये सुरू आहे. कुर्द प्रांतातून सुरू झालेला हा विरोध आता इराणच्या 9 प्रांताच पोहचला आहे. तेहरान, अल्बोर्ज, इस्फहान, फारस, करमान, खोरासन, अझरबैझान आणि गीलान येथेही सरकारच्या महिलाविरोधी धोरणांविरोधात नागरिक रस्त्यावर उतरले आहेत.