नवी दिल्ली / मुझफ्फराबाद: भारताच्या शत्रूंना आणि निष्पाप नागरिकांच्या रक्ताने हात माखलेल्या दहशतवाद्यांना सीमापार जाऊन संपवण्याची मालिका अजूनही सुरूच असल्याचे पाहायला मिळत आहे. वर्ष २०१९ मध्ये पुलवामा येथे झालेल्या भीषण आणि आत्मघाती दहशतवादी हल्ल्याचा मुख्य मास्टरमाईंड आणि वॉन्टेड दहशतवादी 'हमजा बुरहान' याचा पाकिस्तानात खात्मा झाला आहे. सूत्रांच्या माहितीनुसार, पाकिस्तानच्या ताब्यात असलेल्या काश्मीरमधील (PoK) मुझफ्फराबाद शहरात काही अज्ञात बंदूकधाऱ्यांनी या दहशतवाद्याला लक्ष्य केले आणि त्याच्यावर गोळीबार केला. या हल्ल्यात हमजा बुरहान याचा जागीच मृत्यू झाला आहे.

पाकिस्तानात 'शिक्षक' बनून लपवला होता चेहरा

भारतीय सुरक्षा यंत्रणांच्या रडारवर असलेल्या या दहशतवाद्याने पाकिस्तानात आपली खरी ओळख लपवली होती. तो मुझफ्फराबादमध्ये एका सामान्य शाळेत शिक्षक (टीचर) म्हणून काम करत होता. शिक्षकी पेशाच्या आडोशाने तो तेथे सामान्य जीवन जगत असल्याचा आव आणत होता, मात्र प्रत्यक्षात तो तेथूनच आपल्या भारतविरोधी दहशतवादी कारवायांचे जाळे विणत होता. गुरुवारी मात्र अज्ञात हल्लेखोरांनी त्याचा हा बनाव उधळून लावला आणि मुझफ्फराबादच्या भरवस्तीत त्याच्यावर गोळ्या झाडून त्याला यमसदनास पाठवले.

४० हून अधिक जवान झाले होते शहीद

१४ फेब्रुवारी २०१९ रोजी जम्मू-काश्मीरमधील पुलवामा येथे केंद्रीय राखीव पोलीस दलाच्या (CRPF) ताफ्यावर जैश-ए-मोहम्मदच्या दहशतवाद्यांनी आत्मघाती हल्ला केला होता. या अत्यंत भ्याड आणि भीषण हल्ल्यात भारताचे ४० पेक्षा जास्त वीर जवान शहीद झाले होते. या संपूर्ण हल्ल्याचा मुख्य आराखडा तयार करण्यात आणि तो प्रत्यक्ष अंमलात आणण्यात हमजा बुरहान याने महत्त्वाची भूमिका बजावली होती. भारत सरकार आणि देशातील गुप्तहेर यंत्रणा दीर्घकाळापासून या मोस्ट वॉन्टेड दहशतवाद्याच्या शोधात होत्या.

पाकिस्तानात दहशतवाद्यांमध्ये भीतीचे वातावरण

पाकिस्तानच्या भूमीवर भारताच्या मोस्ट वॉन्टेड दहशतवाद्यांना अज्ञात हल्लेखोरांकडून लक्ष्य केले जाण्याची ही पहिलीच वेळ नाही. यापूर्वीही अनेक भारतविरोधी दहशतवादी पाकिस्तानात अशाच प्रकारे रहस्यमयरीत्या मारले गेले आहेत.

हमजा बुरहान याच्या अचानक झालेल्या खात्म्यामुळे पाकिस्तानात आश्रय घेऊन राहणाऱ्या इतर दहशतवादी संघटनांचे प्रमुख आणि त्यांच्या म्होरक्यांमध्ये प्रचंड भीतीचे वातावरण निर्माण झाले आहे. या घटनेनंतर मुझफ्फराबाद परिसराला पाकिस्तानी लष्कराने वेढा घातला असून हल्लेखोरांचा शोध घेतला जात आहे, परंतु अद्याप कोणालाही अटक करण्यात यश आलेले नाही.