Passport Ranking: जगभरातील विविध देशांच्या पासपोर्टची नवीन रॅकिंग जाहीर करण्यात आली आहे. हेन्ली पासपोर्ट इंडेक्समध्ये जगातील सर्वात शक्तिशाली पासपोर्ट आहेत. या निर्देशांकानुसार जपानचा पासपोर्ट हा जगातील सर्वात शक्तिशाली पासपोर्ट आहे. यानंतर सिंगापूर आणि दक्षिण कोरियाच्या पासपोर्टला स्थान देण्यात आले आहे.

दरम्यान, हेन्ली पासपोर्ट इंडेक्सनुसार जर्मनी आणि स्पेनचे पासपोर्ट तिसऱ्या क्रमांकावर आहेत. तर चौथ्या क्रमांकावर फिनलंड, इटली आणि लक्झेंबर्ग, पाचव्या क्रमांकावर ऑस्ट्रिया आणि डेन्मार्कचे पासपोर्ट आहेत. हेन्ली पासपोर्ट इंडेक्सनुसार, जर एखाद्या प्रवाशाकडे जपानी पासपोर्ट असेल तर तो 193 देशांमध्ये कोणत्याही त्रासाशिवाय प्रवास करु शकतो. या बाबतीत सिंगापूर आणि दक्षिण कोरिया थोडे मागे आहेत.

अमेरिका 7 व्या क्रमांकावर आहे, 186 देशांना प्रवेशाची परवानगी

इंग्लंडचा पासपोर्ट सहाव्या क्रमांकावर आहे, ज्यावरुन 187 देशांचा प्रवास करता येतो. अमेरिका 7 व्या स्थानावर आहे. यूएस पासपोर्ट 186 देशांमध्ये प्रवास करण्याची परवानगी आहे. रशियन पासपोर्ट 50 व्या क्रमांकावर आहे. रशियन पासपोर्ट 119 देशांमध्ये प्रवास करण्यास परवानगी देतो. त्याचबरोबर चीन 80 देशांमध्ये पोहोचून 69 व्या क्रमांकावर आहे. एकूण 199 देशांच्या यादीत भारताचा (India) पासपोर्ट 87 व्या क्रमांकावर आहे. भारतीय पासपोर्टधारक 60 देशांमध्ये पूर्व व्हिसाशिवाय प्रवास करु शकतात. त्याचबरोबर भारताचा शेजारी देश पाकिस्तानचा (Pakistan) पासपोर्ट 109 व्या क्रमांकावर आहे. पाकिस्तानी पासपोर्टधारक व्हिसाशिवाय जगातील 32 देशांना भेट देऊ शकतात.

अफगाणिस्तान पासपोर्ट 27 देशांमध्ये थेट प्रवास करण्यास परवानगी देतो

अफगाणिस्तानचा (Afghanistan) पासपोर्ट सर्वात कमी उपयुक्त आहे, ज्यामुळे केवळ 27 देशांमध्ये थेट प्रवास करता येतो.

दुसरीकडे, हा निर्देशांक 17 वर्षातील डेटा एकत्र करुन तयार केला जातो.