Turkey-Syria Earthquake: सिरिया-तुर्कीमधल्या भूकंपाने संपूर्ण जगाला हादरवून सोडले आहे. या भूकंपात आतापर्यत मृत्यूचा आकडा 4500 पर्यंत पोहोचला आहे. तुर्की आणि सिरियामध्ये झालेल्या भूकंपात रहिवाश्यांचे अतोनात हाल झाले आहेत.

भूकंपात अनेक इमारतीदेखील जमीनदोस्त झाल्या आहेत. जगभरातून या दोन देशांना मदत पाठवली जात आहे. भारतानेदेखील ऑपरेशन दोस्त मार्फत तुर्कीला मदत पाठवली आहे.

दरम्यान, पाकिस्तान तुर्कीला मदत पाठवल्याची माहिती समोर आली आहे. मात्र, पाकिस्तानी पत्रकार शाहिद मसूद यांनी खळबळजनक दावा केला आहे. पाकिस्तानमध्ये जेव्हा पूर आला होता तेव्हा तुर्कीने पाकिस्तानला मदत केली होती. तुर्की( Turkey )ने पाठवलेली मदतीचे साहित्य आता पाकिस्तान परत तुर्कीला पाठवत असल्याचे म्हटले आहे.

शाहिद मसूद यांनी म्हटल्यानुसार,पाकिस्तानने तेच साहित्य पॅक केले आहे आणि तुर्कीतल्या भूकंपग्रस्तांना मदतीच्या नावावर तेच साहित्य परत पाठवले आहे. पाकिस्तान( Pakistan )चे प्रधानमंत्री शहबाज शरीफ वैयक्तिक पातळीवर तुर्कीतल्या भूकंपग्रस्त भागाची पाहणी करत असताना असा प्रकार लज्जास्पद आहे.

दरम्यान, या भूकंपात इमारतीखाली दबलेले कित्येक लोक अजूनही अजूनही सापडले नाहीत. बचावकार्य मोठ्या वेगाने सुरु असून अशा लोकांना शोधण्याचे काम सुरु आहे.