Pakistan: सध्या पाकिस्तान आर्थिक संकटाशी झुंजत आहे, त्यामुळे तेथील लोक उपासमारीला सामोरे जात आहेत. परिस्थिती इतकी बिकट आहे की, लोकांना आपली किडनी विकावी लागत आहे.

एकीकडे लोकांकडे पैसे नाहीत, तर दुसरीकडे, गरिबांच्या असहायतेचा फायदा तस्कर घेत आहेत. पाकिस्तानमध्ये (Pakistan) तस्कर पैशासाठी गरिबांची किडनी विकत आहेत.

किडनी करोडोंना विकली जात आहेत

पाकिस्तानातील तस्कर कसाई बनले आहेत. गरिबीचा फायदा घेत त्यांनी आतापर्यंत 328 जणांची किडनी काढली आहे. आश्चर्याची बाब म्हणजे एक किडनी सुमारे एक कोटी रुपयांना विकली जात आहे. पोलिसांनी (Police) पत्रकार परिषदेत ही माहिती दिली.

त्यांनी सांगितले की, तस्कर इथल्या गरिबांची किडनी काढून परदेशात विकत आहेत, जिथे त्यांना प्रत्येक किडनीमागे 30 लाख ते 1 कोटी रुपये मिळतात.

तस्कर टोळीतील आठ जणांना अटक

तस्कर टोळीचा म्होरक्या फवाद मुख्तारवर 300 हून अधिक किडनी काढल्याचा आरोप आहे. मात्र, पोलिसांनी फवादला यापूर्वी पाचवेळा अटक केली होती, मात्र प्रत्येक वेळी तो जामीन मिळवण्यात यशस्वी झाला. सध्या या टोळीतील आठ जणांना पोलिसांनी अटक केली आहे.

चौकशीत, तस्करांनी सांगितले की, ते श्रीमंतांना किडनी विकायचे आणि त्या बदल्यात त्यांच्याकडून मोठी रक्कम घेत.

पूर्व पंजाब प्रांताव्यतिरिक्त पीओकेमध्येही तस्करी करणारी टोळी सक्रिय असल्याचे सांगण्यात आले. किडनी काढल्याने तिघांचा मृत्यू झाल्याची माहितीही पोलिसांनी दिली.

लोकांना किडनी काढण्याबाबत माहिती देण्यात आली नाही

या प्रकरणी पंजाब प्रांताचे मुख्यमंत्री मोहसिन नक्वी म्हणाले की, लोकांच्या गरिबीचा फायदा घेत तस्कर किडनी काढत आहेत. लोकांना किडनी काढण्याबाबत कोणतीही माहिती देण्यात आली नसल्याचेही त्यांनी सांगितले.

तस्कर टोळीच्या या गुन्ह्यात एका मेकॅनिकचाही सहभाग आहे, जो दवाखान्यात जाऊन लोकांना वेठीस धरायचा. ही पहिलीच वेळ नाही, याआधीही जानेवारी महिन्यात पोलिसांनी एका अल्पवयीन मुलाची किडनी काढल्याचा आरोप असलेल्या तस्कर टोळीला पकडले होते.