China Trade Agreement Pakistan: पाकिस्तान सरकारने चीनला गाढवाचे मांस निर्यात करण्यास अधिकृतपणे मंजुरी दिली. एका चिनी कंपनीने आपले कामकाज बंद करण्याचा इशारा दिल्यानंतर पाकिस्तानच्या पंतप्रधान कार्यालयाने या प्रकरणात तातडीने हस्तक्षेप करत हा निर्णय घेतला. हा संपूर्ण वाद ग्वादर बंदरात कार्यरत असलेल्या 'हानगेंग ट्रेड कंपनी'शी संबंधित आहे, जी गाढवांचे मांस आणि कातडी चीनला निर्यात करण्याचे काम करते.

ग्वादर हे शहर चीन पुरस्कृत प्रकल्पांचे मुख्य केंद्र मानले जाते. मात्र, गेल्या काही महिन्यांपासून येथील निर्यातीच्या मंजुरीसाठी प्रशासकीय पातळीवर मोठी दिरंगाई होत होती. या विलंबामुळे पाकिस्तानमधील विदेशी गुंतवणूक असलेल्या प्रकल्पांना नोकरशाहीच्या अडथळ्यांचा कसा सामना करावा लागतो, यावर मोठे प्रश्नचिन्ह निर्माण झाले होते.

अखेर कंपनीने गाशा गुंडाळण्याची धमकी दिल्यानंतर सरकारने हालचाली तीव्र केल्या. विशेष म्हणजे, पंतप्रधान शाहबाज शरीफ हे या महिन्याच्या अखेरीस एका गुंतवणूक मंचाच्या बैठकीसाठी चीन (China) दौऱ्यावर जाणार आहेत. या पार्श्वभूमीवर चीनला नाराज न करण्यासाठी पाकिस्तान सरकारने हा निर्णय घेतल्याचे बोलले जात आहे.

चीनमध्ये गाढवाच्या मांसाला आणि कातडीला मोठी मागणी आहे. याचा वापर प्रामुख्याने पारंपारिक औषधे बनवण्यासाठी केला जातो. ही औषधे विशेषतः रक्तवर्धक आणि त्वचेच्या समस्यांवर गुणकारी म्हणून विकली जातात. सरकारी आकडेवारीनुसार, पाकिस्तान दरवर्षी मांस आणि कातडीसाठी सुमारे 2,16,000 गाढवे चीनला निर्यात करतो. या व्यवसायातून पाकिस्तानला (Pakistan) दरवर्षी सुमारे 30 कोटी अमेरिकन डॉलर्सचा महसूल मिळतो, जो देशाच्या ढासळत्या अर्थव्यवस्थेसाठी महत्त्वपूर्ण मानला जातो.