Pakistan Afghanistan Border Clashes Unama Report: पाकिस्तान आणि अफगाणिस्तान सीमेवर गेल्या काही महिन्यांपासून सुरु असलेल्या भीषण लष्करी चकमकींनी अत्यंत भयंकर रुप धारण केले. ऑक्टोबरपासून जून महिन्याच्या अखेरपर्यंत पाकिस्तानने केलेल्या सीमेपलीकडील हल्ल्यांमध्ये तब्बल 500 निष्पाप अफगाण नागरिकांना आपला जीव गमवावा लागला असून, 1216 हून अधिक जण गंभीर जखमी झाले आहेत.

अफगाणिस्तानमधील संयुक्त राष्ट्र सहाय्य मिशनने प्रसिद्ध केलेल्या एका खळबळजनक अहवालातून हा धडकी भरवणारा पर्दाफाश झाला. पाकिस्तानच्या या वाढत्या लष्करी आक्रमणामुळे सीमेवरील नागरिकांचे जनजीवन उध्वस्त झाले असून, संपूर्ण परिसरात दहशतीचे सावट पसरले.

दोन्ही देशांमधील तणाव गेल्या अनेक महिन्यांपासून खदखदत होता, मात्र फेब्रुवारी महिन्यात अफगाण सैन्याने पाकिस्तानच्या चिथावणीखोर हवाई हल्ल्यांना प्रत्युत्तर देत प्रतिहल्ला चढवला, त्यानंतर परिस्थिती हाताबाहेर गेली. या घटनेनंतर पाकिस्तानने अफगाणिस्तानविरुद्ध थेट 'उघड युद्धाची' घोषणाच करुन टाकली. पाकिस्तानचा आरोप आहे की, अफगाणिस्तानमधील तालिबान सरकार 'तहरीक-ए-तालिबान पाकिस्तान' सारख्या भारत आणि पाक-विरोधी दहशतवादी संघटनांना आपल्या भूमीत सुरक्षित आश्रय देत आहे.

तालिबान सरकारने हे सर्व आरोप फेटाळून लावले असले, तरी पाकिस्तानने अफगाणिस्तानच्या हद्दीत घुसून बाँबहल्ले सुरुच ठेवले. मार्च महिन्यात काबुलमधील एका ड्रग्ज पुनर्वसन केंद्रावर पाकिस्तानने (Pakistan) केलेला हवाई हल्ला हा आंतरराष्ट्रीय स्तरावर टीकेचा धनी ठरला, ज्याला मानवाधिकार संघटना 'ॲम्नेस्टी इंटरनॅशनल'ने थेट 'युद्ध गुन्हे' घोषित करत स्वतंत्र तपासाची मागणी केली.

युनामाच्या अहवालात पाकिस्तानच्या क्रूर रणनीतीचा आणखी एक धक्कादायक प्रकार समोर आला. पहिल्या हवाई हल्ल्यानंतर जेव्हा स्थानिक नागरिक ढिगाऱ्याखाली दबलेल्या लोकांना वाचवण्यासाठी घटनास्थळी गोळा व्हायचे, तेव्हा पाकिस्तानकडून त्याच जागेवर दुसरा हवाई हल्ला केला जायचा. 28 जून रोजी पकतिया प्रांतात एका निवासी इमारतीवर अशाच प्रकारे लागोपाठ दोन हल्ले करण्यात आले, ज्यात 5 बालकांसह 22 जणांचा मृत्यू झाला आणि 185 जण जखमी झाले. बहुतांश जीवितहानी ही बचावकार्यादरम्यान झालेल्या दुसऱ्या हल्ल्यातच झाली.

या गंभीर अहवालावर सफाई देताना पाकिस्तानच्या परराष्ट्र मंत्रालयाने दावा केला की, त्यांच्या सैन्याने केवळ दहशतवाद्यांचे अड्डे आणि ट्रेनिंग सेंटर लक्ष्य केले होते, नागरिकांना नाही. मात्र, युनायटेड नेशन्सच्या या उघडकीस आलेल्या अहवालामुळे पाकिस्तानचा क्रूर चेहरा जगासमोर पुन्हा एकदा आला.