Peshawar Attack: पाकिस्तानातील पेशावर येथील मशिदीत झालेल्या आत्मघातकी स्फोटाप्रकरणी 17 जणांना अटक करण्यात आली आहे. विशेष म्हणजे, या स्फोटात 97 पोलिसांसह 101 जणांचा मृत्यू झाला आहे.

लष्करप्रमुख जनरल असीम मुनीर यांनी अधिकाऱ्यांना दहशतवाद्यांचा खात्मा करण्यासाठी आणि दहशतवादी संघटनांविरुद्ध झिरो टॉलरन्सचे धोरण स्वीकारण्याचे निर्देश दिले आहेत.

काय आहे संपूर्ण प्रकरण

सोमवारी जुहरच्या नमाजाच्या वेळी पुढच्या रांगेतील एका तालिबानी आत्मघाती हल्लेखोराने स्वत:ला उडवले. त्यानंतर सुरक्षा यंत्रणांनी संशयाच्या आधारे 17 जणांना अटक केली आहे. संशयितांची चौकशी सुरु आहे.

ज्याने हल्ल्याची जबाबदारी घेतली

तेहरीक-ए-तालिबान पाकिस्तान (टीटीपी) या संघटनेने आत्मघातकी हल्ल्याची जबाबदारी स्वीकारली असून, गेल्या वर्षी ऑगस्टमध्ये अफगाणिस्तानमध्ये (Afghanistan) त्यांचा कथित कमांडर उमर खालिद खुरासानी याच्या मृत्यूचा बदला घेण्यासाठी हा हल्ला होता.

काय म्हणाले पाकिस्तानचे लष्करप्रमुख जनरल असीम मुनीर?

मंगळवारी रावळपिंडी येथे लष्करी अधिकाऱ्यांच्या परिषदेत जनरल मुनीर म्हणाले की, 'देशातून दहशतवादाचा (Terrorism) नायनाट करण्यासाठी लष्कर सज्ज आहे.' पेशावर मशिदी हल्ल्याचा संदर्भ देत ते पुढे म्हणाले की, "असे अनैतिक आणि भ्याड हल्ले दहशतवादाविरुद्ध लढण्याच्या देशाच्या संकल्पाला धक्का देऊ शकत नाहीत, परंतु कोणत्याही दहशतवादी संघटनेविरुद्ध झिरो टॉलरन्सचे धोरण स्वीकारले पाहिजे."