Nepal China Relationship: पाकिस्तान आणि चीन यांची मैत्री जगभर बदनाम आहे. आता चीन नेपाळबरोबर पुन्हा नव्याने संबंध प्रस्थापित करत आहे. नुकतेच चीनच्या मदतीने नेपाळमध्ये आंतरराष्ट्रीय विमानतळाचे उद्घाटन करण्यात आले आहे. नेपाळ आणि चीनच्या या वाढत्या मैत्रीमुळे नेपाळची अवस्थाही पाकिस्तान आणि श्रीलंकेसारखी होण्याची भीती आहे. चीनच्या जवळ येताच नेपाळचे वाईट दिवस सुरु झाले आहेत.

दरम्यान, भारताचा शेजारी नेपाळ (Nepal) आता फायनान्शियल अॅक्शन टास्क फोर्सच्या (FATF) ग्रे लिस्टमध्ये जाण्याचा धोका आहे. अनेक वर्षे FATF च्या ग्रे लिस्टमध्ये राहिल्यानंतर अलीकडेच पाकिस्तानही बाहेर आला आहे. पृथ्वी मान श्रेष्ठ यांनी 'द काठमांडू पोस्ट' मध्ये एक लेख लिहिला असून दहशतवादाला वित्तपुरवठा आणि मनी लाँड्रिंगशी संबंधित कायद्यांमधील अनेक त्रुटींमुळे नेपाळला FATF कारवाईचा धोका असल्याची भीती व्यक्त केली आहे.

दुसरीकडे, नेपाळ FATF च्या मानकांचे पालन करण्यासाठी धडपडत आहे. नेपाळची आर्थिक स्थिती फारशी चांगली नाही. अनेक गोष्टींसाठी नेपाळ परदेशी मदतीवर अवलंबून आहे. जर नेपाळ ग्रे लिस्टमध्ये गेला तर पाकिस्तानसारखी स्थिती निर्माण व्हायला वेळ लागणार नाही.

नेपाळची ग्रे लिस्टमध्ये जाण्याची दाट शक्यता

'ब्लॅकलिस्ट' हा उच्च जोखमीच्या अधिकारक्षेत्राच्या यादीसाठी वापरला जाणारा शब्द आहे. सध्या उत्तर कोरिया, इराण आणि म्यानमार (Myanmar) ब्लॅक लिस्टमध्ये यादीत आहेत. 'ग्रेलिस्ट'चा वापर मनी लाँड्रिंग आणि दहशतवादाला वित्तपुरवठा रोखण्यासाठी धोरणात्मक कमतरता असलेल्या देशांना सूचित करण्यासाठी केला जातो.

ग्रे लिस्टमध्ये गेल्याने पाकिस्तानचे मोठे नुकसान झाले

चीनचा मित्र देश असलेला पाकिस्तानही बऱ्याच काळापासून FATF च्या ग्रे लिस्टमध्ये आहे. यादरम्यान त्याची आर्थिक स्थिती बिकट झाली होती. थिंकटँक आणि सल्लागार सेवा फर्म तबदलाब प्रायव्हेट लिमिटेड यांनी 2021 मध्ये एका अहवालात म्हटले आहे की, ग्रे लिस्टमुळे पाकिस्तानचे 38 अब्ज डॉलरचे नुकसान झाल्याची शक्यता आहे. 2008 ते 2014 दरम्यान नेपाळ FATF च्या ग्रे लिस्टमध्ये होता. मनी लाँडरिंग विरोधी कारवाई, ज्यात मनी लाँडरिंग विरोधी कायदा 2008 मध्ये सुधारणा आणि इतर कायद्यांची अंमलबजावणी समाविष्ट आहे, FATF ने नेपाळला 2014 मध्ये यादीतून काढून टाकले होते.