Thailand Blast News: थायलंडमध्ये फटाक्यांच्या कारखान्यात भीषण स्फोट झाला आहे. या भीषण स्फोटात 20 जणांचा मृत्यू झाल्याची माहिती आहे. एपीच्या वृत्तानुसार, मध्य थायलंडमधील फटाक्यांच्या कारखान्यात हा स्फोट झाल्याचे एका बचाव कर्मचाऱ्याचे म्हणणे आहे. या स्फोटात 20 जणांचा मृत्यू झाला. मृतांचा हा आकडा आणखी वाढू शकतो. मीडिया रिपोर्ट्सनुसार, सुफान बुरी प्रांतातील स्थानिक बचाव कर्मचाऱ्यांनी ऑनलाइन फोटो पोस्ट केले आहेत, ज्यामध्ये कारखाना पूर्णपणे उद्ध्वस्त झाल्याचे दिसून येत आहे.

दरम्यान, थायलंडमधील फटाक्यांच्या कारखान्यात यापूर्वीही मोठा स्फोट झाला आहे. गेल्या वर्षी जुलैमध्ये थायलंडमध्ये फटाक्यांच्या कारखान्यात मोठा स्फोट झाला होता. या स्फोटात 9 जणांचा मृत्यू तर 115 हून अधिक लोक जखमी झाले होते. नाराथिवास प्रांतातील सुंगाई कोलोक शहरातील फटाक्यांच्या कारखान्यात हा स्फोट झाला होता. या स्फोटाबाबत प्रसारमाध्यमांशी बोलताना त्यावेळचे शहराचे गव्हर्नर सॅनन पोंगकसोर्न यांनी सांगितले होते की, 115 लोक जखमी झाले त्यापैकी अनेकांची प्रकृती गंभीर आहे. त्यावेळीही मदत आणि बचावकार्य युद्धपातळीवर सुरु होते.

घरे आणि दुकानांचे नुकसान

स्फोटाबाबत गव्हर्नरांनी सांगितले होते की, तपासाअंती फटाक्याच्या कारखान्यात स्फोट स्टील वेल्डिंगच्या वेळी आग लागल्याने समोर आले. स्फोटानंतर सोशल मीडियावर व्हायरल झालेल्या फुटेजमध्ये धुराचे प्रचंड लोट उठताना दिसत होते. या स्फोटामुळे अनेक दुकाने, घरे आणि वाहनांचे मोठे नुकसान झाले होते.