Lashkar-e-Taiba Video: दिल्लीतील लाल किल्ल्याजवळ सोमवारी (10 नोव्हेंबर) झालेल्या भीषण कार स्फोटाचा तपास सुरु असतानाच, पाक-व्याप्त काश्मीर मधून जल्लोष करतानाचा एक व्हिडिओ समोर आला आहे. या स्फोटानंतर लष्कर-ए-तैयबाच्या टॉप कमांडर्संनी तिथे एक महत्त्वाची बैठक घेतली. या बैठकीदरम्यान ते जल्लोष करताना दिसले.

दरम्यान, या व्हिडिओमध्ये लष्करचे टॉप कमांडर फुलांचा वर्षाव करताना आणि एकमेकांना हार घालून स्वागत करताना दिसत आहेत. एवढचं नाहीतर, ते खूप आनंदी आणि उत्साहात दिसत आहेत. दिल्लीतील स्फोटानंतर लगेचच ही बैठक झाल्यामुळे त्यांच्या चेहऱ्यावरचा हा आनंद त्या स्फोटाशी निगडित तर नाही ना, असा गंभीर संशय भारतीय सुरक्षा यंत्रणांना आला आहे.

दहशतवाद्यांच्या उत्साहामागे दिल्ली स्फोट?

दिल्लीसारख्या संवेदनशील ठिकाणी मोठा स्फोट झाल्यानंतर पीओकेमध्ये लष्करच्या कमांडर्सकडून हा 'आनंद' साजरा करणे अनेक प्रश्न उपस्थित करतो. दहशतवाद्यांच्या हावभावात जो आनंद आणि उत्साह दिसत आहे, तो कशाबद्दल आहे? दिल्ली स्फोटानंतर लगेच त्यांनी इतकी मोठी आणि महत्त्वाची बैठक का घेतली? दहशतवादी नेमके काय 'सेलिब्रेट' करत आहेत, ज्यासाठी त्यांचे एवढे मोठे स्वागत केले जात आहे? भारतीय तपास यंत्रणांसाठी हा विषय आता पडताळणीचा बनला आहे. लष्करचा हा जल्लोष दिल्लीतील स्फोटात त्यांच्या सहभागाची महत्त्वाची कडी ठरु शकतो.

कोटलीमध्ये बैठक

सुरक्षा एजन्सी या बैठकीकडे गंभीरतेने पाहत आहेत, कारण यामागे एक मोठे षडयंत्र असण्याची शक्यता आहे. ही बैठक बुधवारी (12 नोव्हेंबर) पीओकेतील कोटली भागात झाली. या बैठकीत लष्कर-ए-तैयबाचे टॉप लीडर अब्दुल रऊफ आणि रिझवान हनीफ यांनी हजेरी लावली.

रिझवान हनीफची महत्त्वाची भूमिका

रिझवान हनीफ हा केवळ लष्करचा कमांडर नाही, तर तो दोन मोठ्या दहशतवादी संघटनांना जोडणारा महत्त्वाचा दुवा आहे. हनीफ हा लष्करच्या पीओके युनिटचा उप प्रमुख आहे. तो लष्कर-ए-तैयबा आणि दुसरी मोठी दहशतवादी संघटना जैश-ए-मोहम्मद या दोघांमधील मुख्य दुवा म्हणून काम करतो. तसेच, तो 'हिलाल-उल-हक ब्रिगेड' नावाच्या एका संयुक्त Combat Unit ची कमानही सांभाळतो. ही ब्रिगेड लष्कर आणि जैशच्या दहशतवाद्यांनी मिळून बनवलेली असून ती उघडपणे पीपल्स अँटी फॅसिस्ट फ्रंट (PAFF) या नावाने काम करते.

गेल्या वर्षी झालेल्या पहलगाम हल्ल्यातील दहशतवादी हबीब ताहिर याचेही रिझवान हनीफशी कनेक्शन होते, अशी माहिती मिळाली आहे. या सर्व लिंक्समुळे लष्करच्या या बैठकीचा व्हिडिओ आणि माहिती भारतीय तपास यंत्रणांना दिल्ली स्फोटाच्या तपासासाठी सुगावा देऊ शकते. त्यामुळे दहशतवाद्यांच्या या जल्लोषाच्या व्हिडिओने भारतीय सुरक्षा यंत्रणांची सतर्कता आणखी वाढवली आहे.