Watch Missile Attack Video: अमेरिकेने इराणच्या अणुसुविधांवर केलेल्या हल्ल्याला प्रत्युत्तर म्हणून इराणने कतारमधील अल-उदेद या हवाई तळावर क्षेपणास्त्र हल्ला केला आहे. मध्यपूर्वेतील सर्वात विकसित शहरांपैकी एक असलेल्या कतारची राजधानी दोहामध्ये मोठे स्फोट ऐकू आले, ज्यामुळे शहरात हवाई सुरक्षा प्रणाली सक्रिय झाली आणि सायरन वाजू लागले.

दोहात हवाई हद्दी बंद

या हल्ल्यामुळे दोहा मॉलमध्ये लोक घाबरून आरडाओरडा करत बाहेर धावताना दिसले, याचे व्हिडिओही समोर आले आहेत. इराणची क्षेपणास्त्रे कतारच्या दिशेने येत असताना लहान मुले, महिला आणि पुरुष मॉलच्या बाहेर पडण्यासाठी गर्दी करत होते. या घटनेनंतर कतारने आपली हवाई हद्द तात्पुरती बंद केली आहे, तसेच कुवेत, बहरीन आणि संयुक्त अरब अमिराती यांनीही आपली हवाई हद्द बंद केली आहे.

इराणचा दावा: अमेरिकेच्या हल्ल्याचे प्रत्युत्तर

इराणच्या सर्वोच्च राष्ट्रीय सुरक्षा परिषदेच्या सचिवालयाने एक निवेदन जारी करत म्हटले आहे की, "या यशस्वी कारवाईत वापरण्यात आलेल्या क्षेपणास्त्रांची संख्या, अमेरिकेने इराणच्या अणुसुविधांवर केलेल्या हल्ल्यात वापरलेल्या बॉम्बच्या संख्येइतकी होती." इराणच्या सशस्त्र दलाच्या प्रवक्त्याने सांगितले की, कतारमधील अमेरिकन तळावर 'रिव्होल्यूशनरी गार्ड्स कॉर्प्स'ने हा हल्ला केला आहे. "आम्ही आमच्या शत्रूंना इशारा देतो की, 'हिट अँड रन'चे युग आता संपले आहे." विशेष म्हणजे, इराणने दावा केला की, हा तळ दोहाच्या शहरी आणि निवासी भागांपासून दूर होता, ज्यामुळे सामान्य नागरिकांसाठी धोका कमी होता.

अल-उदेद हवाई तळाचे महत्त्व आणि कतारची भूमिका

दोहाच्या नैऋत्येकडे असलेला अल-उदेद हवाई तळ अमेरिकेचा या क्षेत्रातील सर्वात मोठा लष्करी तळ आहे. येथे सुमारे १०,००० अमेरिकन सैनिक तैनात आहेत आणि हे अमेरिकेच्या सेंट्रल कमांडचे मुख्यालय आहे.

हा तळ हवाई मोहिमांना आधार देतो आणि इराक, सीरिया आणि अफगाणिस्तानमधील ऑपरेशन्ससाठी एक प्रमुख केंद्र आहे. हा तळ २४ हेक्टर (६० एकर) क्षेत्रात पसरलेला असून, येथे सुमारे १०० विमाने आहेत.

कतारने आपल्या भूमीवरील सर्वात मोठ्या अमेरिकन लष्करी तळावरील या हल्ल्याचा तीव्र निषेध केला आहे. कतारच्या परराष्ट्र मंत्रालयाचे प्रवक्ते माजेद अल-अन्सारी यांनी याला आपल्या सार्वभौमत्वाचे आणि हवाई हद्दीचे "घोर उल्लंघन" म्हटले आहे. दरम्यान, अमेरिकेचे राष्ट्राध्यक्ष डोनाल्ड ट्रम्प 'सिच्युएशन रूम'मध्ये बसून इराणच्या या प्रत्युत्तरावर लक्ष ठेवून आहेत.