जेरूसलेम: इराण आणि इस्राईलने सलग तिसऱ्या दिवशी एकमेकांवर क्षेपणास्त्र हल्ले केले. इस्राईलने इराणच्या संरक्षण विभागाच्या मुख्यालयावर आणि अणु कार्यक्रमाशी संबंधित ठिकाणांवर हल्ले केले तर, इराणच्या क्षेपणास्त्रांनीही इस्राईलची हवाई संरक्षण यंत्रणा भेदत अनेक इमारतींवर मारा केला.

इराण अणुबाँब तयार करून आपल्यावर हल्ला करेल, ही शक्यता गृहित धरून इस्राईलने हल्ले सुरू केले. इराणने मात्र युरेनियमचे समृद्धीकरण हे बाँबनिर्मितीसाठी नसल्याचे स्पष्ट करतानाच अणुऊर्जा हा आपला हक्क असल्याचे म्हटले आहे.

इस्राईलने शुक्रवारी इराणच्या युरेनियम समृद्धीकरण केंद्र आणि लष्करी ठिकाणांसह विविध ठिकाणी ड्रोन आणि क्षेपणास्त्रांचा मारा केला होता. यामध्ये इराणचे काही वरिष्ठ लष्करी अधिकारी मारले गेले.

या हल्ल्याला प्रत्युत्तर देताना इराणनेही इस्राईलवर क्षेपणास्त्रांचा वर्षाव केला. आज दोन्ही देशांनी एकमेकांवर हल्ले सुरूच ठेवले. इराणने इस्राईलची हवाई संरक्षण यंत्रणा भेदली. त्यांनी केलेल्या क्षेपणास्त्रांच्या माऱ्यात हैफा शहरातील तेल शुद्धीकरण कारखान्याचे नुकसान झाले.

या हल्ल्यात कोणीही जखमी झाले नसले तरी इस्राईलमध्ये खोलवर मारा करण्याची इराणची क्षमता सिद्ध झाली आहे. इस्राईलनेही इराणची राजधानी तेहरावर क्षेपणास्त्रांचा वर्षाव केला. त्यांनी इराणच्या संरक्षण विभागाचे मुख्यालय व अणुकार्यक्रमाशी संबंधित ठिकाणांना लक्ष्य केले. दरम्यान, इस्राईलमधील सर्व भारतीय सुरक्षित असल्याचे भारतीय दूतावासाने म्हटले आहे.

आणखी हल्ले शक्य

इराणमधील शस्त्रनिर्मिती कारखान्यांमधील नागरिकांनी तातडीने काम बंद करून निघून जावे, असा इशारा इस्राईलने दिला आहे. त्यामुळे इस्राईलकडून अधिक तीव्र हल्ले होण्याची शक्यता आहे. गाझा पट्टी, लेबनॉन आणि येमेनमध्येही हल्ले करण्याचा इस्राईलने दिला आहे.

ट्रम्प यांचा इशारा

इस्राईलला मदत करणाऱ्या अमेरिकेवरही हल्ले करण्याचा इशारा इराणने दिल्यानंतर अमेरिकेचे अध्यक्ष डोनाल्ड ट्रम्प यांनीही इराणला धमकी दिली आहे. ‘इराणने आमच्यावर हल्ले करण्याचा प्रयत्न केल्यास अमेरिकेच्या लष्करी सामर्थ्याची ताकद त्यांना अनुभवायला मिळेल,’ असे ट्रम्प यांनी म्हटले आहे. ‘‘इराणवरील हल्ल्यांशी आमचा काहीही संबंध नाही. त्यामुळे त्यांनीही आमच्यावर हल्ला करू नये. ’’ असे ट्रम्प म्हणाले.