Former Prime Minister Of Pakistan Imran Khan: पाकिस्तानचे माजी पंतप्रधान इम्रान खान यांनी पुन्हा एकदा उघडपणे लष्करावर आरोप केले आहेत. त्यांनी माजी लष्करप्रमुख जनरल बाजवा यांच्यावर सरकार पाडल्याचा आरोप केला आहे.

माझे सरकार अमेरिकेने नाही तर बाजवा यांच्या कारस्थानामुळे पाडले, असे इम्रान खान म्हणाले. इम्रान म्हणाले की, कमर जावेद बाजवा यांनीच अमेरिकनांना इम्रान खान आपला विरोधक असल्याचे पटवून दिले होते.

याआधी, इम्रान खान (Imran Khan) यांनी अमेरिकेवर आपले सरकार पाडल्याचा आरोप केला होता. मात्र इम्रान यांनी पहिल्यांदाच असा यू-टर्न घेतला आहे. गेल्या वर्षी एप्रिलमध्ये माझ्याविरुद्ध कट रचण्यात आला होता आणि त्यात बाजवा यांचा हात असल्याचे त्यांनी सांगितले.

व्हॉईस ऑफ अमेरिकाला दिलेल्या मुलाखतीत इम्रान खान म्हणाले की, पाकिस्तानमध्ये आज जे काही संकट आहे ते बाजवा यांच्यामुळेच आहे. ते पुढे म्हणाले की, 'पाकिस्तानात (Pakistan) आज जे काही घडत आहे, त्यामागे बाजवा आहेत. आतापर्यंत मिळालेल्या पुराव्यांनुसार बाजवा यांनी अमेरिकेला इम्रान खान आपला विरोधक असल्याचे सांगितले होते.'

इम्रान खान यांनी गेल्या वर्षी नोव्हेंबरमध्ये निवृत्त झालेल्या कमर जावेद बाजवा यांना सुपर किंग म्हटले. इम्रान म्हणाले की, 'बाजवा हे सत्तेत सुपर किंगसारखे वागायचे.'

जबाबदारी असेल तर..

यासोबतच खैबर पख्तुनख्वा आणि पंजाबमध्ये निवडणुका घेण्याचीही मागणी इम्रान खान यांनी केली. ते म्हणाले की, 'देश राजकीय आणि आर्थिकदृष्ट्या बदनाम आहे.' दुसरीकडे, सरकार आणि इम्रान खान यांच्यातील तणाव पुन्हा वाढला आहे. शेवटी खान म्हणाले की, पाकिस्तानमध्ये सरकार चालवण्याची पद्धत चुकीची आहे.