Hindu Temple: कॅनडानंतर आता अमेरिकेत हिंदू मंदिराशी छेडछाड झाल्याची घटना समोर आली आहे. नेवार्क, कॅलिफोर्निया येथील हिंदू मंदिराच्या बाहेरील भिंतींवर भारतविरोधी आणि खलिस्तान समर्थक घोषणा लिहिण्यात आल्या आहेत. हिंदू अमेरिकन फाऊंडेशनने ट्विटरवर काही फोटो शेअर केली आहेत, ज्यामध्ये स्वामीनारायण मंदिर वासना संस्थेच्या भिंतींवर भारत आणि पंतप्रधान नरेंद्र मोदी यांच्या विरोधात द्वेषपूर्ण घोषणा लिहिलेल्या दिसतात. खलिस्तानी दहशतवादी जर्नेल सिंग भिंद्रनवालेचे नावही भिंतींवर लिहिलेले आहे. हिंदू अमेरिकन फाऊंडेशनने ट्विटरवर (एक्स) म्हटले आहे की, 'इथे हिंदूंना लक्ष्य करणाऱ्या खलिस्तानी दहशतवादी भिंद्रनवालेचा उल्लेख आहे. हे कृत्य मंदिरात जाणाऱ्यांना दुखावण्याच्या आणि द्वेषाच्या गुन्ह्याच्या कक्षेत येणाऱ्या हिंसाचाराची भीती निर्माण करण्याच्या उद्देशाने केले गेले आहे.'

दरम्यान, फाउंडेशनने नेवार्क पोलिसांना या घटनेचा द्वेषपूर्ण गुन्हा म्हणून तपास करण्याचे आवाहन केले आहे. पोस्टमध्ये म्हटले आहे की, 'कॅलिफोर्नियातील नेवार्क येथील स्वामीनारायण मंदिर वासना संस्थेच्या भिंतींवर खलिस्तान समर्थक घोषणा लिहिण्यात आल्या आहेत. नेवार्क पोलिस आणि नागरी अधिकारांना सूचित केले गेले आहे आणि ते संपूर्ण तपास करतील. आमचा भर आहे की याचा द्वेषपूर्ण गुन्हा म्हणून तपास झाला पाहिजे.' या घटनेबाबत स्थानिकांमध्ये तीव्र संताप व्यक्त होत आहे. त्याचवेळी, नेवार्क पोलिसांनी या प्रकरणाचा सखोल तपास करण्याचे आश्वासन दिले असून संपूर्ण प्रकरणाचा तपास सुरु असल्याचे सांगितले.

अमेरिका आणि कॅनडामध्ये अशा घटना वाढल्या

अमेरिका आणि कॅनडामध्ये यापूर्वीही हिंदू मंदिरांशी छेडछाड झाल्याची प्रकरणे समोर आली आहेत. गेल्या काही महिन्यांपासून अशा घटनांमध्ये वाढ झाल्याचे दिसून येत आहे. विशेषत: कॅनडात मंदिरांची तोडफोड आणि त्यांच्या भिंतींवर लिहिलेल्या खलिस्तान समर्थक घोषणांच्या अनेक घटना घडल्या आहेत. गेल्या ऑगस्टमध्ये बंदी घातलेल्या शीख फॉर जस्टिसच्या कार्यकर्त्यांनी राष्ट्रीय राजधानी नवी दिल्लीतील मेट्रो स्टेशनवर खलिस्तान समर्थक घोषणा लिहिल्या होत्या. जी-20 शिखर परिषदेपूर्वी ही घटना घडली. SFI ने दिल्ली मेट्रो स्थानकांचे फुटेज देखील जारी केले जिथे 'दिल्ली बनेगा खलिस्तान' आणि 'खलिस्तान झिंदाबाद' अशा घोषणा लिहिल्या होत्या. सप्टेंबरमध्ये या प्रकरणी दोघांना अटक करण्यात आली होती, तर आणखी एका आरोपीला काही दिवसांनी ताब्यात घेण्यात आले होते.