Iran Near Surrender Donald Trump Claim: इराण, अमेरिका आणि इस्रायल यांच्यातील वाढत्या तणावाच्या पार्श्वभूमीवर डोनाल्ड ट्रम्प यांनी एक अत्यंत धक्कादायक वक्तव्य केले. जगातील सर्वात शक्तिशाली देशांचा समूह असलेल्या G7 नेत्यांच्या व्हर्च्युअल बैठकीत बोलताना ट्रम्प यांनी दावा केला की, इराण आता पूर्णपणे कमकुवत झाला असून तो शरणागती पत्करण्याच्या अगदी जवळ आहे. 'एक्सिओस'च्या (Axios) एका अहवालात या संदर्भात माहिती देण्यात आली असून, ट्रम्प यांच्या या दाव्याने जागतिक राजकारणात मोठी खळबळ उडाली. अमेरिका आणि इस्रायलने इराणविरुद्ध चालवलेल्या लष्करी मोहिमेला मोठे यश मिळाले असून इराणची प्रतिकारशक्ती आता संपुष्टात येत असल्याचे ट्रम्प यांनी या बैठकीत नमूद केले.

ट्रम्प यांच्या मते, अलीकडच्या काळात इराणवर करण्यात आलेल्या लष्करी कारवायांनी तेथील यंत्रणा पूर्णपणे कोलमडून टाकली. इराणचे (Iran) नेतृत्व सध्या इतके विखुरलेले आणि गोंधळलेले आहे की, अधिकृतरित्या आत्मसमर्पणाची घोषणा करण्यासाठी सुद्धा तिथे कोणी सक्षम व्यक्ती उरलेली नाही. अमेरिका, ब्रिटन, फ्रान्स, जर्मनी, इटली, कॅनडा आणि जपान या G7 राष्ट्रांच्या प्रमुखांशी चर्चा करताना ट्रम्प यांनी स्पष्ट केले की, इराण आता जास्त काळ हा संघर्ष सुरु ठेवू शकणार नाही. या लष्करी मोहिमेने केवळ इराणलाच नव्हे, तर या संपूर्ण प्रदेशातील मोठ्या धोक्याला यशस्वीपणे थोपवून धरले. तथापि, ट्रम्प यांच्या या दाव्यावर इराणकडून अद्याप कोणतीही अधिकृत प्रतिक्रिया किंवा पुष्टी मिळालेली नाही.

ट्रम्प यांनी यापूर्वीही इराणला 'बिनशर्त शरणागती' पत्करण्याचा इशारा दिला होता. इराणसोबत कोणतीही चर्चा किंवा तडजोड तेव्हाच शक्य आहे, जेव्हा ते पूर्णपणे हार मानतील, अशी आक्रमक भूमिका ट्रम्प यांनी वारंवार मांडली. मात्र, ट्रम्प यांच्या या वक्तव्यामुळे G7 देशांच्या नेत्यांमध्येही मतमतांतरे पाहायला मिळत आहेत. काही नेत्यांना वाटते की, ट्रम्प यांचे हे वक्तव्य युद्ध समाप्तीची नांदी ठरु शकते, तर काहींना भीती वाटते की अशा वक्तव्यांमुळे इराण अधिक चिडू शकतो आणि हा संघर्ष अधिक काळ लांबणीवर पडू शकतो. इराणची स्थिती खरोखरच शरणागती पत्करण्यासारखी आहे की ट्रम्प हे मनोवैज्ञानिक युद्धाचा (Psychological Warfare) भाग म्हणून असे वक्तव्य करत आहेत, याकडे आता जगाचे लक्ष लागले आहे.