Donald Trump Statement: अमेरिकेचे राष्ट्राध्यक्ष डोनाल्ड ट्रम्प यांनी पाकिस्तानकडून भू-खनिजे आणि इतर लाभ मिळवण्याच्या प्रयत्नात आपली पातळी बऱ्याच अंशी खाली आणल्याचे दिसून येत आहे. पाकिस्तानचे पंतप्रधान शाहबाज शरीफ आणि लष्करप्रमुख असीम मुनीर यांची अति-स्तुती करणारे ट्रम्प यांनी यावेळी तर त्यांच्या स्तुतीमध्ये कोणतीही कसर सोडली नाही. ट्रम्प यांनी शाहबाज शरीफ आणि लष्करप्रमुख असीम मुनीर यांना 'महान लोक' (Great people) असे संबोधले.

पाकिस्तान-अफगाणिस्तान वाद सोडवण्याचे आश्वासन

मलेशियातील कुआलालंपूर येथे आसियान (ASEAN) शिखर परिषदेदरम्यान थायलंड-कंबोडिया शांतता करारावर स्वाक्षरी करताना ट्रम्प यांनी पाकिस्तानी नेत्यांना "महान लोक" म्हटले. एवढचं नाहीतर पाकिस्तान आणि अफगाणिस्तान यांच्यातील वाद "लवकरच" सोडवण्याचे वचन देखील दिले. ट्रम्प म्हणाले की, त्यांच्या सरकारने आठ महिन्यांच्या कालावधील आठ युद्धे संपवली. ते पुढे म्हणाले की, "आम्ही दर महिन्याला सरासरी एक युद्ध संपवत आहोत. आता फक्त एकच शिल्लक आहे. मी ऐकले आहे की, पाकिस्तान आणि अफगाणिस्तान यांच्यात संघर्षाची ठिणगी पडली आहे, पण मी त्यांच्यातील हा संघर्ष लवकरच संपवेन. मी दोघांनाही ओळखतो."

ट्रम्प यांनी पाकिस्तानचे लष्करप्रमुख आणि पंतप्रधान यांच्यावर स्तुतीसुमनांचा वर्षाव केला. ट्रम्प म्हणाले की, "पाकिस्तानचे फील्ड मार्शल आणि पंतप्रधान 'महान लोक' आहेत आणि यात मला शंका नाही.''

जीव वाचवण्यासाठी युद्ध संपवतो

ट्रम्प म्हणाले की, जर मी वेळ काढून लाखो लोकांचे जीव वाचवू शकत असेन, तर हे खरोखरच एक महान कार्य आहे. त्यांनी दावा केला की, आठ महिन्यांत आठ युद्धे संपवणे असे यापूर्वी कधीही झाले नाही. ट्रम्प पुढे म्हणाले की, "मला असा कोणताही राष्ट्राध्यक्ष दिसत नाही, ज्याने कधी एक युद्ध थांबवले असेल. ते युद्धाची सुरुवात करतात, मात्र संपवत नाहीत."

शेवटी ट्रम्प यांनी थायलंड-कंबोडिया संघर्ष सोडवण्याबद्दल तसेच अमेरिकेबरोबर मैत्रीपूर्ण संबंध प्रस्थापित केल्याबद्दल आनंद व्यक्त केला.