Mopa Airport : मोपा विमानतळ विकास की कासारवर्णे गावाचा विनाश ? ग्रामस्थ संतप्त ; पावसाळ्यात उद्‍भवते पूरसंकट

मोरजी : मोपा आंतरराष्ट्रीय विमानतळाच्या विकासामुळे कासारवर्णे गावातील ग्रामस्थांचे जीवन धोक्यात आले आहे, असा गंभीर आरोप ग्रामस्थांकडून करण्यात येत आहे. दरवर्षी पावसाळा सुरू झाला की, या गावासमोर मोठे संकट उभे राहत असल्याचे चित्र आहे.

विमानतळ परिसरातून येणारे पावसाचे प्रचंड पाणी डोंगर उतारातून थेट शेतात आणि रस्त्यावर येत असल्याने गावात पूरस्थिती उद्‍भवते. या पाण्यासोबत माती, दगड आणि लाकडांचा मोठा साठा शेतांत जमा होतो. परिणामी शेतीचे मोठे नुकसान होत असून, रस्ते तासंतास पाण्याखाली जात असल्याने वाहतूकही पूर्णपणे ठप्प होते.

अनेकदा वाहनचालक आणि शेतकरी जीव धोक्यात घालून या पाण्यातून मार्ग काढताना दिसतात. ‘मोठा अपघात झाल्यानंतरच प्रशासन जागे होणार का?’ असा संतप्त सवाल ग्रामस्थ उपस्थित करत आहेत.याशिवाय, बाळा बारजवळील अरुंद पूल, चांदेल प्लांटची पाइपलाईन आणि वाढलेली झाडं पाण्याच्या प्रवाहात अडथळा निर्माण करत असल्याने रस्त्यावर पाणी तुंबते आणि स्थिती अधिकच गंभीर बनते.

मुख्यमंत्र्यांनीच उपाययोजना करावी!

विकासाच्या नावाखाली मोठमोठी आश्वासने दिली जात असताना प्रत्यक्षात मात्र लोकांच्या जीवाशी खेळ होत असल्याचा आरोपही करण्यात येत आहे. सध्या गावातील नागरिकांना दररोज पाण्याने भरलेल्या रस्त्यांमधून जीव मुठीत धरून येजा करावी लागत आहे. स्थानिक आमदार प्रवीण आर्लेकर आणि मुख्यमंत्री प्रमोद सावंत यांनी स्वतः घटनास्थळी भेट देऊन तात्काळ उपाययोजना कराव्यात, अशी कासारवर्णेकरांची ठाम मागणी आहे.