चीनच्या (China) हेनान प्रांतातील कारखान्याला भीषण आग लागली. या आगीत सुमारे 36 जणांचा मृत्यू झाला. एनयांग शहरातील एका कारखान्यात ही घटना घडली. चिनी माध्यमांनी मंगळवारी याबाबत माहिती दिली. या आगीच्या घटनेत आणखी दोन जण जखमी झाले असून, दोघांचा अद्याप शोध लागलेला नाही.

सोमवारी दुपारी चारच्या सुमारास आग लागली. ती विझवण्यासाठी अग्निशमन दलाच्या जवानांना अनेक तास मेहनत घ्यावी लागली. 200 हून अधिक मदत कर्मचारी आणि सुमारे 60 अग्निशमन दल आग विझवण्यात गुंतले होते. अहवालात असे म्हटले की, एनयांग शहरातील हाय-टेक झोन वेनफेंग जिल्ह्यातील कैक्सिंडा ट्रेडिंग कंपनी लिमिटेडमध्ये आग लागली. या घटनेनंतर परिसरात काही तास गोंधळ उडाला. 

अग्निशमन दलाच्या 63 गाड्यांनी आग विझवली 

स्थानिक माध्यमांनी दिलेल्या माहितीनुसार, अग्निशमन दलाच्या पथकांनी घटनास्थळी 63 गाड्या पाठवल्या होत्या. स्थानिक वेळेनुसार रात्री 8 वाजता आग आटोक्यात आणण्यात आली आणि रात्री 11 वाजेपर्यंत पूर्णपणे आटोक्यात आली. या अपघातात 36 जणांचा मृत्यू झाला असून दोघांना किरकोळ दुखापत झाल्याने उपचारासाठी रुग्णालयात दाखल करण्यात आले आहे. दाखल झालेल्यांची प्रकृती सध्या ठीक असल्याचे डॉक्टरांचे म्हणणे आहे. 

• 2015 मध्ये एक धोकादायक स्फोट झाला होता

मार्च 2019 मध्ये, शांघायपासून 260 किमी अंतरावर असलेल्या यानचेंग येथील एका रासायनिक कारखान्यात स्फोट झाला, 78 लोक ठार झाले आणि अनेक किलोमीटरच्या परिघात घरे उद्ध्वस्त झाली. आणि 2015 मध्ये, चीनच्या सर्वात वाईट औद्योगिक अपघातांपैकी एक, उत्तर तियानजिनमधील रासायनिक गोदामात झालेल्या प्रचंड स्फोटात 165 लोक ठार झाले.