Russia-Ukraine War: गेल्या वर्षी फेब्रुवारीपासून सुरु असलेल्या युक्रेन-रशिया युद्धात अलीकडच्या पाच महिन्यांत रशियाचे मोठे नुकसान झाले आहे.

युक्रेनमध्ये रशियन हवाई हल्ले सुरु असताना, डिसेंबरपासून 20,000 रशियन नागरिक मारले गेले आहेत, तर सुमारे 100,000 लोक जखमी झाले, असा अमेरिकेचा अंदाज आहे.

दरम्यान, युक्रेनच्या (Ukraine) पूर्वेकडील डोनेस्तक भागात रशियन आणि युक्रेनियन सैन्यांमध्ये भयंकर लढाई सुरु आहे, जिथे रशिया बाखमुत शहराला वेढा घालण्याचा प्रयत्न करत आहे.

दुसरीकडे, व्हाईट हाऊसच्या राष्ट्रीय सुरक्षा परिषदेचे प्रवक्ते जॉन किर्बी म्हणाले की, रशियन हानीचा अंदाज नुकत्याच सार्वजनिक करण्यात आलेल्या नवीन यूएस गुप्तचरांवर आधारित आहे. मात्र, गुप्तचर मंडळींनी कोणत्या आधारावर हा अंदाज लावला हे त्यांनी सांगितले नाही.

किर्बी म्हणाले की, मृतांपैकी निम्मे हे खाजगी वॅगनर गटाने भरती केलेले सैनिक होते, ज्यात रशियन तुरुंगातील कैद्यांची संख्या सर्वाधिक आहे.

युक्रेनच्या पूर्वेकडील प्रांतातील बाखमुत शहराभोवती अलीकडच्या काही दिवसांत भयंकर लढाई सुरु आहे, जिथे वॅगनर सैन्य आणि इतर सैन्य युक्रेनियन सैन्याशी लढत आहेत. रशियन सैन्याने पश्चिम रस्ता पुन्हा ताब्यात घेण्याचा प्रयत्न केला, जो अजूनही युक्रेनियन सैन्याच्या ताब्यात आहे.

दुसरीकडे, युक्रेनच्या हवाई संरक्षण दलाने सोमवारी पहाटे रशियन सैन्याने प्रक्षेपित केलेल्या 18 पैकी 15 क्षेपणास्त्रे नष्ट केली.

राष्ट्राध्यक्ष वोलोडिमिर झेलेन्स्की यांनी सोमवारी सांगितले की, रशियन क्षेपणास्त्र (Missile) हल्ले पूर्वेकडील पावलोहराड शहरावर रात्रभर सुरुच राहिले, ज्यात दोन लोक ठार आणि 40 जखमी झाले.