Pakistan Afghanistan Clash: दोन दिवसांपूर्वी पाकिस्तानने अफगाणिस्तानवर केलेल्या हवाई हल्ल्याला (Air Strikes) अफगाणिस्तानच्या सैन्याने जोरदार प्रत्युत्तर दिले. ड्युरंड लाइनवरील (Durand Line) खुर्रम जिल्ह्यातील गावी परिसरात पाकिस्तान आणि अफगाण सीमा दलांमध्ये जोरदार संघर्ष झाला. या चकमकीत पाकिस्तानचे 58 सैनिक ठार झाले असून अफगाण सैन्याने सीमेवरील 25 पाकिस्तानी चौक्यांवर (Posts) कब्जा केल्याचा दावा केला.

दरम्यान, या वाढत्या तणावामुळे पाकिस्तानने खैबर पख्तूनख्वा आणि बलुचिस्तान प्रांतात अफगाणिस्तानला लागून असलेली सीमा बंद केली आहे. पाकिस्तानचे पंतप्रधान शाहबाज शरीफ यांनी हल्ल्याचा निषेध करत कडक उत्तर देण्याचा संकल्प व्यक्त केला.

पाकिस्तानी चौक्यांवर अफगाण सैन्याचा कब्जा

मिळालेल्या माहितीनुसार, 9-10 ऑक्टोबरच्या रात्री पाकिस्तानच्या सैन्याने टीटीपी प्रमुख नूर वली मेहसूदला लक्ष्य करत अफगाणिस्तानमधील काबूल, खोस्त, जलालाबाद आणि पक्तिका येथे हल्ला केला होता. याला उत्तर देण्यासाठी अफगाणिस्तानच्या 201 खालिद बिन वालिद आर्मी कोरने लगेच कारवाई केली. अफगाण सैनिकांनी पाकिस्तानच्या फ्रंटियर कॉर्प्सच्या तळांवर खुर्रम, बाजौर आणि उत्तर वझिरीस्तान येथे एकाच वेळी जोरदार हल्ला केला. त्यांनी तोफ, मोर्टार आणि ड्रोन हल्ले (Drone Attack) यांचा वापर केला.

इस्लामिक एमिरेट्स ऑफ अफगाणिस्तानच्या सैन्याने पाकिस्तानच्या अंगूर अड्डा, बाजौर, खुर्रम, दीर, चित्राल आणि बलुचिस्तानमधील बारामचा येथील चौक्यांवर गोळीबार करुन त्यांचा ताबा घेतला आणि त्या उद्ध्वस्त केल्या. तसेच, कुनार, नंगरहार, पक्तिका, खोस्त आणि हेलमंद येथेही दोन्ही देशांच्या सैन्यामध्ये जोरदार चकमकी झाल्याचे तालिबान अधिकाऱ्यांनी दुजोरा दिला. अफगाण सैनिकांनी पाक सैनिकांकडून हथियार हिसकावून हल्ला केल्याचेही वृत्त आहे.

अफगाण सरकारचे स्पष्टीकरण

अफगाणिस्तानच्या तालिबान सरकारचे प्रवक्ते जबिहुल्लाह मुजाहिद यांनी काबुलमधील पत्रकार परिषदेत पाकिस्तानवर गंभीर आरोप केले. मुजाहिद यांनी पाकिस्तानवर त्यांच्या भूमीवर आयएसआयएस (ISIS) ला आश्रय दिल्याचा आरोप केला. ते म्हणाले की, अफगाणिस्तानला आपल्या हवाई आणि भूमी सीमांचे संरक्षण करण्याचा पूर्ण अधिकार आहे. त्यांनी पाकिस्तानला दहशतवाद्यांना आश्रय देणे थांबवून त्यांना अफगाण सरकारच्या हवाली करण्याची मागणी केली. पाकिस्तानच्या खैबर पख्तूनख्वामध्ये दहशतवादी केंद्रे कार्यरत असल्याचा दावाही त्यांनी केला.

पुढील हल्ल्यास कठोर प्रत्युत्तराचा इशारा

तालिबानच्या संरक्षण मंत्रालयाने पाकिस्तानला स्पष्ट इशारा दिला आहे. पाकिस्तानने पुन्हा एकदा अफगाणिस्तानच्या प्रादेशिक अखंडतेचे (Territorial Integrity) उल्लंघन करण्याचा प्रयत्न केल्यास, अफगाणिस्तानचे सशस्त्र दल देशाच्या सीमांचे संरक्षण करण्यासाठी पूर्णपणे तयार आहेत आणि कठोर प्रतिक्रिया देतील. दरम्यान, भारतीय गुप्तचर यंत्रणा दोन्ही देशांमधील या वाढत्या तणावावर लक्ष ठेवून आहेत.

यापूर्वी, पाकिस्तानने अफगाणिस्तानवर हल्ला केल्याचा इन्कार केला होता आणि तालिबानने तहरीक-ए-तालिबान (TTP) च्या दहशतवाद्यांना आश्रय देऊ नये, अन्यथा परिणाम भोगावे लागतील, असा इशारा दिला होता. अमेरिकेचे माजी दूत जलमाय खलीलजाद यांनीही या संघर्षावर चिंता व्यक्त करत, लष्करी हल्ले हा तोडगा नाही. दोन्ही देशांनी कूटनीतीचा वापर करुन वाद सोडवावा, असे आवाहन केले होते.