Mexico Bus Accident: मध्य मेक्सिकोमध्ये स्थलांतरितांना घेऊन जाणाऱ्या बसचा अपघात झाला आहे. यात 17 जणांचा मृत्यू झाल्याची माहिती समोर आली आहे. बसमध्ये 45 प्रवाशांना घेऊन उत्तरेकडे जात असताना रविवारी दुपारी महामार्गावर हा अपघात झाला.

व्हेनेझुएला, कोलंबिया आणि मध्य अमेरिकेतील स्थलांतरितांना घेऊन जात होती. अशी माहिती पुएब्लाचे गृहमंत्री ज्युलिओ हुएर्टा यांनी पत्रकारांना दिली आहे.

"अपघातात झाला त्यावेळी ऑन स्पॉट पंधरा जणांनी आपला जीव गमवला आहे." असे हुएर्टा यांनी पत्रकार परिषदेत सांगितले. दुखापतग्रस्त आणखी 15 जणांना रुग्णालयात दाखल करण्यात आले, त्यापैकी दोघांचा उपचारादरम्यान मृत्यू झाला, असे त्यांनी सांगितले. दरम्यान, इतर पाच जणांची प्रकृती गंभीर आहे. असे हुएर्टा म्हणाले.

टूर्स टुरिस्टिकॉस मेडिना नावाच्या खाजगी बस लाइनचा ही बस आहे, दक्षिण मेक्सिकोच्या सीमावर्ती शहर तपाचुला येथून मेक्सिको सिटीकडे जात असताना हा अपघात झाला. असे स्थानिकांनी सांगितले. मृतांमध्ये बसचा चालक आणि सहाय्यक यांचा समावेश आहे.

कोलंबियाच्या परराष्ट्र मंत्रालयाने याबाबत एक निवेदन जारी केले आहे. मृतांमध्ये एका 56 वर्षीय कोलंबियन व्यक्तीचा समावेश आहे. तर, बचावलेल्यांमध्ये कोलंबियातील दोन पुरुष आणि एक महिलेचा समावेश आहे. जखमींना पुएब्ला येथे रुग्णालयात दाखल करण्यात आले आहे.

चालकाचे वाहनावरील नियंत्रण सुटल्याने बसचा अपघात झाल्याचे मेक्सिकन माध्यमांनी म्हटले आहे.

दरम्यान, गेल्या आठवड्यात, पनामामध्ये डझनभर स्थलांतरित लोक ज्या बसमध्ये प्रवास करत होते तीचा अपघात झाला. बस एका कड्यावरून खाली पडल्याने हा अपघात झाला.