पाकिस्तानमधील लाहोर शहरातील बाजारपेठेत शक्तिशाली बॉम्बस्फोट झाल्याचे वृत्त समोर आले आहे. पीटीआय या वृत्तसंस्थेने दिलेल्या माहितीनुसार, या घटनेत तीन जणांचा मृत्यू तर 20 जण जखमी झाले आहेत. पोलिसांनी दिलेल्या माहितीनुसार, हा स्फोट लाहोरच्या (Lahore) प्रसिद्ध अनारकली मार्केटच्या पान मंडीमध्ये झाला, जिथे भारतीय वस्तूंची विक्री केली जाते. लाहोर पोलिसांचे प्रवक्ते राणा आरिफ यांनी स्फोटात तीन जणांचा मृत्यू झाल्याची पुष्टी केली आहे. डॉन न्यूज पेपरच्या वृत्तानुसार, स्फोटामुळे आजूबाजूच्या दुकानांच्या आणि इमारतींच्या खिडक्यांच्या काचा फुटल्या आहेत. आतापर्यंत कोणत्याही गटाने या स्फोटाची जबाबदारी स्वीकारलेली नाही. (3 killed 20 injured in Lahore market blast)

दरम्यान, उपमहानिरीक्षक (Police operations) डॉ. मोहम्मद आबिद (Dr. Mohammed Abid) म्हणाले, “आम्ही स्फोटाचे कारण शोधण्याचा प्रयत्न करत आहोत. 20 हून अधिक लोक जखमी झाले असून त्यांना रुग्णालयात दाखल करण्यात आले आहे. आबिदने मोटारसायकल किंवा टाइम डिव्हाईस मार्केटमध्ये कोणत्याही ठिकाणी लावले जाण्याची शक्यता नाकारली नाही.

ते पुढे म्हणाले, “ या स्फोटाच्या ठिकाणी असलेल्या खड्ड्यांमुळे टाइम डिव्हाईसचा वापर झाल्याचे सूचित होते. तथापि, आम्ही आत्तापर्यंत याची पुष्टी करु शकत नाही. दहशतवाद विरोधी विभाग आणि बॉम्ब शोधक पथक अधिकारी घटनास्थळी पोहोचले असून स्फोटाच्या प्रकाराची चौकशी करत आहेत. रेस्क्यू 1122 च्या माहितीनुसार, जखमींना मेयो हॉस्पिटलमध्ये हलवण्यात आले असून तिथे दोघांचा मृत्यू झाला आहे.

शिवाय, मेयो रुग्णालयाचे (Hospital) वैद्यकीय अधीक्षक डॉ इफ्तिखार यांनी सांगितले की, एका बालकासह दोघांचा मृत्यू झाला आहे. रुग्णालयात दाखल करण्यात आलेल्या चौघांची प्रकृती चिंताजनक आहे. स्फोटामुळे मोटारसायकल स्टॉल्स आणि विक्रेत्यांचेही मोठे नुकसान झाले आहे. पोलिसांनी परिसराची नाकेबंदी केली आहे. स्फोटानंतर संपूर्ण अनारकली मार्केट बंद करण्यात आले आहे.