West Bengal Election Results 2026: पश्चिम बंगाल विधानसभा निवडणुकीचे चित्र आता स्पष्ट होऊ लागले असून मतमोजणीच्या कलानुसार भारतीय जनता पक्षाने बहुमताचा आकडा पार केला. याच पार्श्वभूमीवर भाजप नेते शुभेंदु अधिकारी यांनी राज्यात भाजपचे पुढील सरकार स्थापन होईल, असा ठाम विश्वास व्यक्त केला. अधिकारी हे नंदीग्राममधून पुन्हा निवडणूक लढवत असून त्यांनी मुख्यमंत्री ममता बॅनर्जी यांना भवानीपूर मतदारसंघातून कडवे आव्हान दिले.

शुभेंदु अधिकारी यांनी माध्यमांशी बोलताना दावा केला की, यावेळी मोठ्या संख्येने मुस्लिम मतदारांनी तृणमूल काँग्रेसला (TMC) साथ दिलेली नाही. भवानीपूर मतदारसंघातही असाच कल पाहायला मिळत असल्याचे त्यांनी नमूद केले. अधिकारी म्हणाले की, "मी 9व्या किंवा 10व्या फेरीनंतर आघाडी घेईन आणि या जागेवर विजय मिळवीन". हिंदू मते भाजपच्या बाजूने एकवटल्याचा दावाही त्यांनी यावेळी केला.

बंगालमधील 294 पैकी 293 विधानसभा जागांसाठी मतमोजणी सुरु आहे. दक्षिण 24 परगणा जिल्ह्यातील 'फाल्टा' या एका जागेवर निवडणूक आयोगाने 21 मे रोजी पुन्हा मतदान घेण्याचे आदेश दिले आहेत, त्यामुळे आज 293 जागांचे निकाल जाहीर होणार आहेत. ताज्या कलानुसार, भाजप 174 जागांवर आघाडीवर असून बहुमताच्या आकड्यापेक्षा खूप पुढे गेला. दुसरीकडे, सत्ताधारी तृणमूल काँग्रेस 116 जागांवर आघाडीवर आहे, तर इतर 3 जागांवर आघाडीवर आहेत. फाल्टा मतदारसंघातील सर्व 285 केंद्रांवर फेरमतदान झाल्यानंतर त्या जागेचा निकाल स्पष्ट होईल. बंगालमधील या राजकीय उलथापालथीमुळे संपूर्ण देशाचे लक्ष या निकालांकडे लागले आहे.