दक्षिण आफ्रिकेविरुद्ध पार पडलेल्या तीन सामन्यांच्या एकदिवसीय मालिकेत भारतीय फिरकीपटू कुलदीप यादव याने केलेल्या भेदक गोलंदाजीमुळे तो चर्चेचा केंद्रबिंदू ठरला आहे. या मालिकेत कुलदीपने २०.७८ च्या सरासरीने एकूण ९ बळी घेत सर्वोत्तम गोलंदाज म्हणून आपली छाप पाडली.

मालिकेतील सर्वाधिक विकेट्स घेणारा खेळाडू ठरल्यानंतर त्याला ‘इम्पॅक्ट प्लेयर ऑफ द सिरीज’ हा पुरस्कार देण्यात आला. मात्र, हा पुरस्कार स्वीकारताना विराट कोहलीने केलेली मजेशीर टिप्पणी सध्या सोशल मीडियावर चांगलीच व्हायरल होत आहे.

या मालिकेत कुलदीपने सातत्यपूर्ण कामगिरी केली. पहिल्या वन-डे सामन्यात त्याने ६८ धावा देत ४ महत्त्वाचे बळी घेत भारताला सामन्यात आघाडी मिळवून दिली. दुसऱ्या सामन्यात त्याला फक्त एकच विकेट मिळाली, मात्र त्याने मितभाषी गोलंदाजी करत फलंदाजांवर दबाव कायम ठेवला. निर्णायक तिसऱ्या सामन्यात पुन्हा ४ बळी घेत त्याने भारताच्या मालिकाविजयात मोलाचा वाटा उचलला. या कामगिरीमुळे एकदिवसीय संघातील त्याचे स्थान अधिक भक्कम झाले आहे.

बीसीसीआयने सोशल मीडियावरील अधिकृत अकाउंटवर एक व्हिडिओ शेअर केला असून, त्यात सहाय्यक प्रशिक्षक रयान टेन डोशेट यांनी कुलदीपला पुरस्कार प्रदान केला. पुरस्कार जाहीर करताना त्यांनी कुलदीपच्या अचूक लाइन-लेंथ आणि दबावपूर्ण परिस्थितीत केलेल्या गोलंदाजीचे विशेष कौतुक केले. फलंदाजांसाठी अनुकूल असलेल्या खेळपट्ट्यांवर विकेट्स घेणे सोपे नसते, असे सांगत त्यांनी कुलदीपच्या कामगिरीला “मॅच-विनिंग” असे संबोधले.

पुरस्कार स्वीकारल्यानंतर घडलेला एक मजेशीर प्रसंग सध्या क्रिकेट चाहत्यांमध्ये चर्चेचा विषय ठरत आहे. कुलदीप आपल्या जागेकडे परतताना काही सहकाऱ्यांनी त्याला भाषण देण्याची विनंती केली.

त्याच क्षणी विराट कोहलीने हसत-हसत हिंदीत “रो दे, रो दे” अशी टोमणा मारला. त्यामुळे ड्रेसिंग रूममध्ये एकच हशा पिकला. त्यानंतर कुलदीपने थोडक्यात प्रतिक्रिया देत विराट कोहली आणि यशस्वी जायसवाल यांच्या कामगिरीचे कौतुक केले.

कसोटी मालिकेत पराभव पत्कारल्यानंतर भारत ही वन-डे मालिका विजय मिळविण्यात यशस्वी ठरला. आता दोन्ही संघांमधील आगामी टी-२० मालिकेकडे चाहत्यांचे लक्ष लागले आहे. कुलदीप यादव सध्या उत्तम फॉर्ममध्ये असल्याने मर्यादित षटकांच्या क्रिकेटमध्येही तो भारताच्या यशात महत्त्वाची भूमिका बजावेल का हे पाहावे लागेल.