मुंबईहून कोलकाताला जाणाऱ्या इंडिगो एअरलाइन्सच्या विमान क्रमांक 6E-138 मध्ये एक धक्कादायक घटना घडली. विमानात एका प्रवाशाने अचानक दुसऱ्या प्रवाशाला थप्पड मारली. यावेळी त्या प्रवाशाला पॅनिक अटॅक आला होता. ही संपूर्ण घटना कॅमेऱ्यात कैद झाली असून त्याचा व्हिडिओ सोशल मीडियावर प्रचंड व्हायरल होत आहे.

समोर आलेल्या व्हिडिओनुसार, पॅनिक अटॅक आलेल्या एका प्रवाशाला एअर होस्टेस मदत करत होती. त्याच वेळी दुसऱ्या प्रवाशाने त्याला जोरदार चापट मारली. या घटनेनंतर, फ्लाइटमध्ये उपस्थित असलेल्या दुसऱ्या प्रवाशांनी तुम्ही असे का केले? म्हणून जाब विचारला.

यावर मला याचा त्रास होत आहे, असे उत्तर त्याने दिले. दरम्यान, तुम्हाला कोणावरही हात उचलण्याचा अधिकार नाही, असे इतर प्रवाशांनी त्यांना सुनावले.

विमानात सहप्रवाशाला थप्पड मारणाऱ्या आरोपीचे नाव हाफिजुल रहमान असे आहे. विमान कोलकाता येथे पोहोचताच त्याला प्रथम सीआयएसएफच्या स्वाधीन करण्यात आले. त्यानंतर त्याला विमानतळावरील एनएससीबीआय पोलिस ठाण्यात नेण्यात आले, जिथे त्याला विधाननगर पोलिसांनी अटक केली.

इंडिगो एअरलाइन्सने काय म्हटले?

इंडिगो एअरलाइन्सने एक अधिकृत निवेदन जारी करून प्रवाशाच्या या कृतीचा तीव्र निषेध केला. आमच्या विमानात झालेल्या या हाणामारीच्या घटनेची आम्हाला जाणीव आहे. असे अनुशासनहीन वर्तन पूर्णपणे अस्वीकार्य आहे आणि आमच्या प्रवाशांच्या आणि कर्मचाऱ्यांच्या सुरक्षिततेला आणि प्रतिष्ठेला तडजोड करणाऱ्या कोणत्याही कृत्याचा आम्ही तीव्र निषेध करतो, असे इंडिगोने म्हटले आहे.

आरोपी प्रवाशाची ओळख पटवून त्याला बेशिस्त घोषित करण्यात आले आणि विमान कोलकाता पोहोचताच त्याला सुरक्षा एजन्सींच्या ताब्यात देण्यात आले. क्रू टीमने निर्धारित मानक कार्यपद्धती (एसओपी) नुसार काम केले आणि सर्व संबंधित नियामक एजन्सींना माहिती देण्यात आली, असे कंपनीने स्पष्ट केले आहे.