Uttar Pradesh Crime: उत्तर प्रदेशातील प्रतापगडमध्ये एका तरुणाला झाडाला बांधून बेदम मारहाण केल्याची घटना समोर आली आहे. तरुणाला मारहाण करतानाचा व्हिडिओ व्हायरल होऊ लागल्यावर पोलिसांनी या प्रकरणाची दखल घेतली.

व्हायरल व्हिडिओच्या आधारे पोलिसांनी घटनेचा तपास सुरु केला आहे. व्हिडिओमध्ये पीडित तरुणाला अर्धनग्न अवस्थेत झाडाला (Trees) दोरीने बांधलेले दिसत आहे.

तो हात जोडून लोकांकडे विनवणी करत आहे, पण त्याचे कोणीच ऐकत नाही. यावेळी लोक त्याला शिवीगाळ करताना दिसले. लोकांनी त्याला लाथा-बुक्क्यांनी मारहाण केली.

काय आहे संपूर्ण प्रकरण?

दरम्यान, तरुणाला मारहाणीचा व्हायरल झालेला व्हिडिओ प्रतापगडच्या पट्टी कोतवाली येथील बहुटा गावातील आहे. मध्यरात्री एका व्यक्तीच्या घराची भिंत पाडण्याचा प्रयत्न करत असताना गावातील लोकांनी या तरुणाला पकडल्याचे बोलले जात आहे.

यावेळी गावकऱ्यांनी त्याला धावत पकडले. आणि चोर समजून त्याला बेदम मारहाण केली. मारहाणीदरम्यान तरुणाचा शर्ट फाटला. तो अर्धनग्न झाला. त्यानंतर लोकांनी त्याला दोरीने झाडाला बांधले.

दुसरीकडे, व्हायरल झालेला व्हिडिओ जुना असला तरी पोलीस त्याचा तपास करत आहेत. मिळालेल्या माहितीनुसार, ही घटना 13 ऑगस्टची आहे. पीडित तरुण या गावात आपल्या नातेवाईकाच्या घरी वारंवार येत असे. त्याच गावातील एका तरुणीसोबतही त्याचे प्रेमसंबंध होते.

रात्रभर तरुणाला मारहाण केली

तसेच, तरुणाला जवळपास रात्रभर गावकऱ्यांनी बेदम मारहाण केली. मात्र या जमावामधील एकानेही पोलिसांना माहिती दिली नाही. सकाळनंतर झाडाला बांधलेल्या तरुणाची सुटका करण्यात आली. या संपूर्ण प्रकरणाबाबत पूर्व पोलीस अधीक्षक विद्यासागर मिश्रा यांनी सांगितले की, व्हायरल झालेल्या व्हिडिओची दखल घेत स्थानिक पोलीस (Police) तपास करत आहेत.