Kanpur Chakeri Crime: उत्तर प्रदेशातील कानपूरमधून कौटुंबिक नात्यांना आणि विश्वासाला काळिमा फासणारी एक अत्यंत गंभीर आणि संतापजनक घटना समोर आली. येथील चकेरी पोलीस ठाण्याच्या हद्दीत राहणाऱ्या एका विवाहित महिलेने स्वतःच्या सख्ख्या मावशी आणि मामावर अत्यंत गंभीर आरोप केले, ज्यामुळे कौटुंबिक नात्यांच्या मर्यादांवरच मोठे प्रश्नचिन्ह उभे राहिले.

मावशी आणि मामाने कौटुंबिक संबंधांचा आणि विश्वासाचा गैरफायदा घेऊन सुरुवातीला तिला गुंगीचे औषध दिले आणि त्यानंतर तिचे आक्षेपार्ह फोटो आणि व्हिडिओ बनवून तिला दीर्घकाळ ब्लॅकमेल केल्याचा आरोप या पीडितेने केला. इतकेच नव्हे तर, या फोटोंच्या जोरावर तिला जबरदस्तीने चुकीच्या कामांत ढकलले गेले आणि तिचे मोठे आर्थिक शोषणही करण्यात आले.

पीडित महिलेने (Women) पोलिसांत दिलेल्या तक्रारीनुसार, हा संपूर्ण प्रकार 2014 पासून सुरु झाला. तिच्या मावशी आणि मामाने अत्यंत पद्धतशीरपणे कट रचून तिला गुंगीचे पदार्थ खायला घातले. ती बेशुद्ध झाल्यानंतर तिचे अश्लील फोटो आणि व्हिडिओ काढण्यात आले. यानंतर तिच्या आयुष्यात छळाचे सत्र सुरु झाले. विरोध केल्यास तिला मारहाण, शिवीगाळ आणि प्रचंड मानसिक त्रास दिला जात होता. या अश्लील क्लिप्सचा वापर करुन तिला ब्लॅकमेल करत तिच्या इच्छेविरुद्ध देहव्यापार सारख्या दलदलीत ढकलण्याचा प्रयत्न केला गेला. या त्रासातून सुटका व्हावी म्हणून तिने लग्न केले, परंतु लग्नानंतरही या नराधमांनी तिचा पिच्छा सोडला नाही आणि पैशांची मागणी सुरुच ठेवली.

या प्रकरणातील अधिक धक्कादायक बाब म्हणजे, आरोपींनी महिलेवर दबाव आणण्यासाठी एका कथित तांत्रिकाचीही मदत घेतली आणि तिला विविध प्रकारे घाबरवून चुकीची कामे करण्यास भाग पाडले. अखेरच्या टप्प्यात तर पीडितेच्या अवघ्या आठ महिन्यांच्या निष्पाप बाळाला जिवे मारण्याची किंवा नुकसान पोहोचवण्याची धमकी देऊन तिच्याकडून पैसे उकळण्यात आले. गेल्या 20 महिन्यांत आरोपींनी तिच्याकडून सुमारे दीड लाख रुपये वसूल केले, ज्यामध्ये अलीकडेच घेतलेल्या एक लाखाचाही समावेश आहे.

जेव्हा पीडितेने आणखी पैसे देण्यास स्पष्ट नकार दिला, तेव्हा आरोपींनी तिचे अश्लील व्हिडिओ सोशल मीडियावर व्हायरल करण्याची धमकी दिली. या सततच्या धमक्या आणि असह्य मानसिक त्रासाला कंटाळून अखेर महिलेने पोलिसांत धाव घेतली. या संवेदनशील प्रकरणाची दखल घेत पोलिसांनी तक्रारीच्या आधारे सखोल तपास सुरु केला असून तपासात समोर येणाऱ्या तथ्यांच्या आधारे दोन्ही आरोपींवर कडक कायदेशीर कारवाई केली जाईल, असे आश्वासन पोलीस अधिकाऱ्यांनी दिले.