नुपूर शर्मांना पाठिंबा देणाऱ्या दुकानदाराच्या हत्येनंतर उदयपूरमध्ये तणावाचे वातावरण आहे. हत्येतील आरोपीचा व्हिडिओ समोर आल्यानंतर संपूर्ण देशात संतापाची लाट उसळली आहे. दरम्यान, काँग्रेस नेते राहुल गांधी यांनीही या घटनेचा निषेध केला आहे. धर्माच्या नावाखाली अशी तोडफोड खपवून घेतली जाणार नाही, असे त्यांनी म्हटले आहे. (Udaipur Shopkeeper Murder Nupur Sharma Rahul Gandhi Said Should Be Strict Punishment)

दरम्यान, एका ट्विटमध्ये राहुल गांधी (Rahul Gandhi) म्हणाले की, 'उदयपूरमधील जघन्य हत्येमुळे मला खूप मोठा धक्का बसला आहे. धर्माच्या नावावर होणारी क्रूरता खपवून घेतली जाणार नाही. या क्रूरतेमुळे दहशत पसरवणाऱ्यांना त्वरित शिक्षा झाली पाहिजे. आपण सर्वांनी मिळून द्वेषाचा पराभव केला पाहिजे. मी सर्वांना आवाहन करतो, कृपया शांतता राखा.'

असदुद्दीन ओवेसी यांच्यावर कठोर कारवाईची मागणीही केली

असदुद्दीन ओवेसीही (Asaduddin Owaisi) ट्वीटमध्ये म्हणाले की, 'उदयपूरमधील निर्घृण हत्या निंदनीय आहे. अशा हत्येचा कोणीही बचाव करु शकत नाही. कायदा हातात घेण्याचा अधिकार कोणालाही नाही, अशी आमच्या पक्षाची भूमिका आहे. आम्ही नेहमीच हिंसेला विरोध केला आहे. दोषींवर कठोर कारवाई करावी, अशी आमची मागणी आहे. कायद्याचे राज्य राखले पाहिजे.'

दुसरीकडे, या घटनेनंतर उदयपूरमधील (Udaipur) बाजारपेठा बंद करण्यात आल्या आहेत. हिंदु संघटनांनी जोरदार घोषणाबाजी केली. उदयपूर जिल्ह्यात 24 तासासाठी इंटरनेट सेवा बंद करण्यात आली आहे. राजस्थानचे राज्यपाल कलराज मिश्रा (Governor Kalraj Mishra) यांनीही या घटनेचा निषेध केला असून हे अत्यंत दुर्दैवी असल्याचे त्यांनी म्हटले आहे. त्यांनी जनतेला जातीय सलोखा राखण्याचे आवाहन केले आहे.