चित्रपट आणि ओटीटी प्लॅटफॉर्मवरील वेब सिरीजची वाढती ऑनलाइन पायरसी रोखण्यासाठी केंद्र सरकारने कठोर पावले उचलण्यास सुरुवात केली आहे. लोकप्रिय मेसेजिंग अॅप Telegram ला माहिती आणि प्रसारण मंत्रालयाने (I&B) नोटीस बजावत, प्लॅटफॉर्मवर कॉपीराइट असलेला चित्रपट आणि डिजिटल कंटेंट बेकायदेशीरपणे प्रसारित करणाऱ्या चॅनेल्स आणि ग्रुप्सविरोधात तातडीने कारवाई करण्याचे निर्देश दिले आहेत. तसेच या संदर्भात १५ दिवसांच्या आत सविस्तर अहवाल सादर करण्यास सांगण्यात आले आहे.
सरकारने Telegram ला पाठवलेल्या नोटिशीत, कॉपीराइट असलेले चित्रपट, वेब सिरीज आणि ओटीटीवरील इतर कंटेंट विनापरवानगी शेअर करणाऱ्या चॅनेल्सवर प्रभावी कारवाई करण्याचे निर्देश दिले आहेत. याशिवाय, अशा प्रकारचा गैरवापर पुन्हा होऊ नये यासाठी प्लॅटफॉर्मची यंत्रणा अधिक मजबूत करण्यावर भर देण्यात आला आहे.
सरकारच्या सूचनांनुसार, कंपनीने केलेल्या उपाययोजनांचा तपशील १५ दिवसांच्या आत मंत्रालयाकडे सादर करणे आवश्यक राहणार आहे.
ऑनलाइन पायरसीमुळे चित्रपट निर्माते, ओटीटी प्लॅटफॉर्म, निर्माते, वितरक आणि प्रसारमाध्यम क्षेत्राशी संबंधित अनेक घटकांना मोठ्या आर्थिक नुकसानीला सामोरे जावे लागत आहे. अनेकदा नवीन चित्रपट किंवा वेब सिरीज प्रदर्शित झाल्यानंतर काही तासांतच त्यांच्या बेकायदेशीर प्रती विविध ऑनलाइन प्लॅटफॉर्मवर उपलब्ध होतात.
यामुळे मूळ कंटेंट तयार करणाऱ्यांच्या उत्पन्नावर परिणाम होत असून, क्रिएटर इकॉनॉमीला मोठा फटका बसत असल्याची भूमिका सरकारने घेतली आहे.
सरकारच्या नोटिशीनंतर Telegram कंपनीकडून याबाबत अधिकृत भूमिका मांडली जाण्याची अपेक्षा आहे. कंपनीने दिलेल्या मुदतीत अहवाल सादर करून पायरसीविरोधात कोणती पावले उचलली आहेत, याची माहिती देणे आवश्यक असेल.
दरम्यान, इलेक्ट्रॉनिक्स आणि माहिती तंत्रज्ञान मंत्रालयाने (MeitY) अलीकडेच Telegram आणि Signal या दोन्ही प्लॅटफॉर्मना आणखी एक नोटीस पाठवली आहे. या नोटिशीत 'युजरनेम' फीचरच्या माध्यमातून होणारा संभाव्य गैरवापर, बनावट ओळख (Impersonation), ऑनलाइन फसवणूक आणि सायबर सुरक्षेबाबत माहिती मागवण्यात आली आहे.
यापूर्वी अशाच प्रकारची नोटीस Meta कंपनीलाही पाठवण्यात आली होती. नव्या युजरनेम सुविधेमुळे फिशिंग, डिजिटल अटक (Digital Arrest) आणि इतर ऑनलाइन फसवणुकीच्या घटनांमध्ये वाढ होऊ शकते, अशी सरकारची चिंता आहे.
ऑनलाइन पायरसी आणि सायबर फसवणुकीला आळा घालण्यासाठी केंद्र सरकारने आता डिजिटल प्लॅटफॉर्मवर अधिक कडक नजर ठेवण्यास सुरुवात केली आहे. त्यामुळे आगामी काळात कॉपीराइटचे उल्लंघन करणाऱ्या Telegram चॅनेल्स आणि इतर डिजिटल माध्यमांवर अधिक कठोर कारवाई होण्याची शक्यता व्यक्त केली जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.