तामिळनाडू: कुड्डालोर जिल्ह्यातून एक धक्कादायक घटना समोर आली आहे. स्कूल बसला विल्लुपुरम-मयिलादुथुराई पॅसेंजर ट्रेनने जोराची धडक दिली. यात तीन विद्यार्थ्यांचा मृत्यू झाला असून, बस चालकासह काही विद्यार्थी जखमी झाले आहे. मंगळवारी (०८ जुलै) सकाळी साडे सातच्या सुमारास ही घटना घडली.

चारुमती (१६), सेझियान (१५) आणि निमलेश (१२) अशी मृत्यू झालेल्या तीन मुलांची नावे आहेत. तर व्हॅन चालकासह इतर काही जण जखमी झाले आहेत आणि त्यांना सरकारी रुग्णालयात दाखल करण्यात आले आहे.

सेम्मनकुप्पमजवळ हा अपघात झाला बस रेल्वे ट्रॅक ओलांडत होती यावेळी भरधाव आलेल्या ट्रेनने बसला जोराची धडक दिली. धडकेनंतर बस ५० मीटरपर्यंत लांब ओढली गेली आणि तिचे तुकडे तुकडे झाले.

या अपघाताबद्दल रेल्वेने माहिती देताना, गेटकीपर फाटक बंद करण्यासाठी पुढे येत असताना व्हॅन चालकाने जबरदस्तीने ट्रॅक ओलांडण्याचा प्रयत्न केला. दक्षिण रेल्वेने या अपघाताबद्दल दुःख व्यक्त केले आहे.

रेल्वेने याप्रकरणी एक निवेदन जारी केले आहे. कुड्डालोर आणि अलप्पक्कम दरम्यान रेल्वे लेव्हल क्रॉसिंग गेट क्रमांक १७० (एक नॉन-इंटरलॉक गेट) च्या गेटकीपरला निष्काळजीपणामुळे निलंबित करण्यात आले आहे. गेटकीपरला सेवेतून काढून टाकण्याची प्रक्रिया देखील सुरू करण्यात आली आहे. त्याच वेळी, रेल्वेने मृतांच्या कुटुंबियांना प्रत्येकी ५ लाख रुपये आणि जखमींना ५० हजार रुपयांची मदत जाहीर केली आहे.