भारतीय टी-२० क्रिकेट संघाचा कर्णधार सूर्यकुमार यादव सध्या एका वेगळ्याच कारणाने चर्चेत आला आहे. ग्लॅमर आणि क्रिकेटचे नाते जुनेच असले तरी, प्रसिद्ध अभिनेत्री खुशी मुखर्जीने केलेल्या एका वक्तव्याने सोशल मीडियावर चर्चांना उधाण आले आहे. खुशीने दावा केला आहे की, सूर्यकुमार यादव तिला मेसेज करायचा, मात्र आता त्यांच्यात संवाद होत नाही. आपल्या बोल्ड लूकमुळे नेहमीच चर्चेत राहणाऱ्या खुशीच्या या विधानामुळे क्रिकेट प्रेमींच्या भुवया उंचावल्या आहेत.

नेमकं प्रकरण काय?

एका प्रसिद्ध वृत्तवाहिनीला दिलेल्या मुलाखतीत खुशीने क्रिकेटर्स आणि सेलिब्रिटींसोबतच्या तिच्या संबंधांवर भाष्य केले. ती म्हणाली, "अनेक क्रिकेटर्स माझ्या मागे होते. सूर्यकुमार यादव मला खूप मेसेज करायचा, पण आता आमच्यात जास्त बोलणे होत नाही." विशेष म्हणजे, तिने हेदेखील स्पष्ट केले की तिला कोणत्याही क्रिकेटरसोबत नाव जोडले गेलेले आवडत नाही. लिंकअपच्या बातम्यांपासून दूर राहणेच ती पसंत करते, असेही तिने यावेळी नमूद केले.

खुशी मुखर्जी केवळ या दाव्यामुळेच नाही, तर तिच्या वैयक्तिक आयुष्यातील एका दुर्दैवी घटनेमुळेही चर्चेत होती. तिने अलीकडेच खुलासा केला होता की, तिच्या काही मित्रांनी तिला गुंगीचे औषध देऊन तिच्या घरातील २५ लाख रुपयांचे दागिने चोरले. "जेव्हा मित्रच शत्रू बनतात आणि यशामुळे त्यांच्यात मत्सर निर्माण होतो, तेव्हा काय करावे?" असा उद्विग्न सवाल तिने उपस्थित केला होता. या घटनेमुळे ती मानसिकदृष्ट्या कोलमडली होती, परंतु तिने धैर्याने या परिस्थितीचा सामना केला.

कोण आहे खुशी मुखर्जी?

कोलकाता येथे जन्मलेली २९ वर्षीय खुशी मुखर्जी गेल्या अनेक वर्षांपासून अभिनय क्षेत्रात सक्रिय आहे. तिने २०१३ मध्ये तमिळ चित्रपट 'अंजल थुरई'मधून आपल्या करिअरची सुरुवात केली. त्यानंतर तिने तेलुगू आणि हिंदी चित्रपटांमध्येही नशीब आजमावले. मात्र, तिला खरी प्रसिद्धी 'एमटीव्ही स्प्लिट्सविला १०' आणि 'लव स्कूल ३' यांसारख्या प्रसिद्ध रिॲलिटी शोमधून मिळाली. सध्या ती सोशल मीडियावर आपल्या बोल्ड फोटोंमुळे प्रचंड सक्रिय असते.