Sukbhbir Sandhu, Gyanesh Kumar appointed new election commissioners:

माजी नोकरशहा सुखबीर संधू आणि ज्ञानेश कुमार यांची निवडणूक आयुक्तपदी नियुक्ती करण्यात आली आहे. सरकारआधीच लोकसभेतील काँग्रेस नेते अधीर रंजन चौधरी यांनी आज दुपारी माध्यमांना ही माहिती दिली. अधीर रंजन चौधरी हे देखील निवडणूक आयुक्तांच्या निवडीशी संबंधित समितीचा एक भाग आहेत.

पंतप्रधानांच्या नेतृत्वाखालील समितीने दोन निवडणूक आयुक्तांची निवड करण्यासाठी बैठक घेतली. बैठकीनंतर समितीचे सदस्य अधीर रंजन चौधरी म्हणाले की, समितीसमोर सहा नावे ठेवण्यात आली होती, त्यापैकी या दोन नावांना मंजुरी देण्यात आली आहे. अधीर रंजन पुढे म्हणाले की, माजी नोकरशहा एसएस संधू आणि ज्ञानेश कुमार यांची निवडणूक आयुक्त म्हणून नावे निश्चित करण्यात आली आहेत.

दरम्यान, सुखबीर संधू आणि ज्ञानेश कुमार हे 1988 च्या बॅचचे निवृत्त आयएएस अधिकारी आहेत. संधू हे आयएएसच्या उत्तराखंड कॅडरचे आहेत, तर कुमार केरळ कॅडरचे आहेत. संधू यांनी यापूर्वी उत्तराखंडचे मुख्य सचिव आणि भारतीय राष्ट्रीय महामार्ग प्राधिकरणाचे अध्यक्ष अशा महत्त्वाच्या सरकारी पदांवर काम केले आहे. तर कुमार यांनी संसदीय कामकाज मंत्रालय आणि अमित शाह (Amit Shah) यांच्या नेतृत्वाखालील सहकार मंत्रालयात सचिव म्हणून काम केले आहे.

दरम्यान, पंतप्रधान आणि अधीर रंजन चौधरी यांच्याशिवाय केंद्रीय गृहमंत्री अमित शाह हेही या बैठकीला उपस्थित होते. निवड समितीमध्ये सरन्यायाधीशांच्या जागी केंद्रीय मंत्र्याचा समावेश करण्याच्या कायद्यावरुन काँग्रेस (Congress) नेत्याने केंद्रावर निशाणा साधला. या समितीत भारताचे सरन्यायाधीश असायला हवे होते, असे सांगून ते म्हणाले की, गेल्या वर्षी आणलेल्या नव्या कायद्यामुळे ही बैठक केवळ औपचारिकतेपर्यंत मर्यादित राहिली. पॅनेलमध्ये सरकार बहुमतात आहे. त्यांना जे पाहिजे ते आहे."

चौधरी यांनी पुढे सांगितले की, ''काल रात्री त्यांना 212 नावांची यादी पाठवण्यात आली होती. ते पुढे म्हणाले की, "मी काल रात्री दिल्लीला पोहोचलो आणि आज दुपारी मीटिंग होती. मला 212 नावं देण्यात आली. एका दिवसात इतक्या उमेदवारांची पडताळणी कशी काय करु शकतो? बैठकीपूर्वी 6 नावे शॉर्टलिस्ट करण्यात आली. त्यामुळे अखेर त्यांनी त्यांना हवा असलेला उमेदवार निवडला.''

दुसरीकडे, आदल्या दिवशी निवडणूक आयोगाच्या दोन नवीन निवडणूक आयुक्तांची निवड करण्यासाठी पंतप्रधानांच्या अध्यक्षतेखालील उच्चाधिकार समितीची बैठक झाली होती. ही बैठक यापूर्वी 15 मार्च रोजी सायंकाळी 6 वाजता होणार होती. निवडणूक आयुक्त अनुप चंद्र पांडे गेल्या महिन्यात निवृत्त झाल्याने आणि शुक्रवारी अरुण गोयल यांनी अचानक राजीनामा दिल्याने निवडणूक आयुक्तांची दोन पदे रिक्त झाली होती.