Jawaharlal Nehru University: दिल्लीतील जवाहरलाल नेहरु विद्यापीठात (JNU) हिंसाचार आणि गोंधळाची घटना समोर आली आहे. शिष्यवृत्ती घेण्यासाठी विद्यार्थी इथे आले होते, असे सांगण्यात येत आहे. याचदरम्यान तिथे उपस्थित असलेल्या सुरक्षारक्षकांशी विद्यार्थ्यांची झटापट झाली.

मीडिया रिपोर्ट्सनुसार, एबीव्हीपी-समर्थित विद्यार्थ्यांनी फेलोशिप जारी न केल्याबद्दल जेएनयूमधील वित्त अधिकाऱ्याचा घेराव केला. फेलोशिपच्या मुद्द्यावरुन वाद सुरु असताना एबीव्हीपी समर्थक असलेल्या जेएनयूच्या विद्यार्थ्यांनी वित्त अधिकाऱ्यालाही दोन तास ओलीस ठेवले.

दरम्यान, ABVV ने त्यांच्या अधिकृत ट्विटर हँडलवर एक व्हिडिओ शेअर केला आहे. त्यात म्हटले आहे की, 'जेएनयूच्या रेक्टरच्या भ्रष्टाचाराचा पर्दाफाश करण्यात आला आहे. विद्यार्थ्यांच्या रखडलेल्या शिष्यवृत्तीसाठी एबीव्हीपी आंदोलन करत होती. यादरम्यानच जेएनयूमध्ये सुरक्षा रक्षक म्हणून तैनात असलेल्या रेक्टरच्या गुंडांनी विद्यार्थ्यांवर हल्ला केला.'

दुसरीकडे, विद्यार्थ्यांचा आरोप आहे की, 'वर्षानुवर्षे रखडलेल्या फेलोशिपसाठी विद्यार्थ्यांनी व्यवस्थापनाच्या हलगर्जीपणाविरुद्ध आवाज उठवला. यादरम्यानच फेलोशिप मागण्यासाठी आलेल्या विद्यार्थ्यांबरोबर व्यवस्थापनाने गुंडागर्दी करण्याचा प्रयत्न केला.'

तसेच, विद्यापीठाकडे पैसे असतानाही प्रशासन महिनोनमहिने विद्यार्थ्यांचे पैसे हडप करत असल्याचेही विद्यार्थ्यांचे म्हणणे आहे. आमची स्वतःची स्कॉलरशिप मागितल्याबद्दल आम्हाला वाईट वागणूक दिली जाते, आणि मारहाण केली, असे विद्यार्थ्यांचे म्हणणे आहे.

शिवाय, जेएनयूमधील (JNU) हल्ल्याच्या या घटनेबाबत काही मीडिया रिपोर्ट्समध्ये असे सांगण्यात येत आहे की, यात सुमारे अर्धा डझन विद्यार्थी (Students) जखमी झाले आहेत. या भांडणात जेएनयूमधील अभाविप अध्यक्ष रोहित कुमारही जखमी झाला आहे. याप्रकरणी विद्यार्थी लवकरच पोलिसांत (Police) तक्रार नोंदवू शकतील, असेही बोलले जात आहे.