Rahul Gandhi viral video: काँग्रेस नेते आणि लोकसभेतील विरोधी पक्षनेते राहुल गांधी यांनी निवडणूक आयोगावर पुन्हा एकदा 'वोट चोरी'चा आरोप केला आहे. यासाठी त्यांनी 'लापता लेडीज' या लोकप्रिय चित्रपटापासून प्रेरित होऊन एक व्हिडिओ शेअर केला आहे. या व्हिडिओद्वारे त्यांनी जनतेला 'वोट चोरी से आझादी' या अभियानात सहभागी होण्याचे आवाहन केले आहे.

व्हिडिओतून साधला निशाणा

राहुल गांधींनी त्यांच्या सोशल मीडिया अकाउंटवर (X) हा व्हिडिओ शेअर करताना लिहिले की, "चोरी चोरी, चुपके चुपके... अब और नहीं, जनता जाग गई है." व्हिडिओमध्ये एक व्यक्ती पोलीस ठाण्यात आपली वस्तू चोरीला गेल्याची तक्रार नोंदवते.

पोलिसांनी विचारले, "काय चोरीला गेले?", तेव्हा तो माणूस थोडासा संकोच करून उत्तर देतो, "वोट." त्यावर पोलीस अधिकारी आश्चर्यचकित होऊन, "हे कसं शक्य आहे?" असा प्रश्न विचारतो. व्हिडिओच्या शेवटी, "तुमच्या मताची चोरी म्हणजे तुमच्या अधिकारांची चोरी," असा संदेश दिला आहे.

'व्होट चोरी से आझादी' अभियानाची सुरुवात

काँग्रेसने 'वोट चोरी से आझादी' अभियान सुरू केले असून, या मोहिमेअंतर्गत लोकांना भाजप आणि निवडणूक आयोगाच्या कथित 'वोट चोरी'विरोधात एकत्र येण्याचे आवाहन केले आहे. यापूर्वी, स्वातंत्र्यदिनाच्या निमित्ताने काँग्रेसने लोकांना त्यांच्या सोशल मीडियावरील डिस्प्ले पिक्चर बदलून या अभियानाला पाठिंबा देण्याची विनंती केली होती.

राहुल गांधींकडून 'वोटर अधिकार यात्रा' जाहीर

बिहारमधील आगामी विधानसभा निवडणुकांच्या पार्श्वभूमीवर १४ ऑगस्ट रोजी राहुल गांधी यांनी 'वोटर अधिकार यात्रा' सुरू करण्याची घोषणा केली. मतदार यादीतील विशेष सुधारणा प्रक्रियेविरोधात ही यात्रा असल्याचे त्यांनी म्हटले आहे.

"१७ ऑगस्टपासून #VoterAdhikarYatra द्वारे आम्ही बिहारच्या भूमीतून 'वोट चोरी' विरोधात थेट लढा सुरू करत आहोत," असे ते म्हणाले. हा केवळ निवडणुकीचा मुद्दा नसून, लोकशाही, संविधान आणि 'एक व्यक्ती, एक मत' या तत्त्वांचे संरक्षण करण्यासाठीची ही एक निर्णायक लढाई आहे. आम्ही संपूर्ण देशात स्वच्छ मतदार यादी सुनिश्चित करू, असेही राहुल गांधी यांनी ठामपणे सांगितले.

कर्नाटक आणि निवडणूक आयोगाचाही उल्लेख

यापूर्वी, ७ ऑगस्ट रोजी राहुल गांधी यांनी निवडणूक आयोगावर टीका करताना, निवडणुका नियोजित असतात असा आरोप केला होता. कर्नाटकच्या महादेवनगर विधानसभा मतदारसंघातील मतदानाचा अभ्यास सादर करताना त्यांनी १,००,२५० मतांची कथित चोरी झाल्याचा दावा केला होता. या आरोपांनंतर निवडणूक आयोगाने राहुल गांधींना त्यांच्या दाव्यांच्या पुष्टीसाठी लेखी निवेदन सादर करण्यास सांगितले आहे.