बॉलिवूड अभिनेत्री आणि चित्रपट निर्माती पूजा भट्ट काँग्रेसच्या भारत जोडो यात्रेत सहभागी झाली आहे. सध्या ही यात्रा हैदराबाद येथे पोहोचली असून या यात्रेत काँग्रेस नेते राहुल गांधी (Rahul Gandhi) यांच्यासह पूजा भट्टही सहभागी झाली आहे. पूजा भट्टचे फोटो आणि व्हिडीओ सोशल मीडियावर व्हायरल होत आहे.

भारत जोडो यात्रेत सहभागी होणारी पूजा भट्ट (Pooja Bhatt) पहिलीच बॉलिवूड सेलिब्रिटी आहे. या यात्रेदरम्यान पूजा भट्टनं फुल स्लीव्हजचा काळ्या रंगाचा कुर्ता आणि प्रिंटेड स्टोल परिधान केला होता. पूजानं हात हलवून समर्थकांचं स्वागत केलं. यादरम्यान तिला पाहण्यासाठी नागरिकांची गर्दी झाली होती. 

यापूर्वी स्वरा भास्करनं राहुल गांधी आणि भारत जोडा यात्रेचं कौतुक केलं होतं. अभिनेत्रीनं ट्वीटमध्ये लिहिलं होतं की, "निवडणुकीत पराभव, ट्रोलिंग, वैयक्तिक हल्ले आणि सतत टीका होत असतानाही राहुल गांधी ना तेढ वाढवणाऱ्या वक्तव्यांना बळी पडले, ना राजकारणाला बळी पडले. या देशाची स्थिती पाहता भारत जोडो यात्रेसारखा प्रयत्न कौतुकास्पद आहे." तसेच, राहुल गांधी यांच्या नेतृत्वाखाली बुधवारी सकाळी तेलंगणातील हैदराबाद येथून भारत जोडो यात्रेला सुरुवात झाली. शहरातील वाहतूक पोलिसांनी मोर्चासंदर्भात वाहतूकीत बदल केले आहेत