Gujarat Election Result: गुजरातमध्ये भाजपने 182 पैकी 156 जागा जिंकत नवा विक्रम नोंदवला आहे. यापुर्वी काँग्रेसने 1985 मध्ये माधवसिंह सोळंकी यांच्या नेतृत्वाखाली विधानसभेच्या 149 जागा जिंकल्या होत्या. तर नरेंद्र मोदी हे मुख्यमंत्री असताना 2002 मध्ये विधानसभा निवडणुकीत भाजपने 127 जागा जिंकल्या होत्या. यंदा मात्र भुपेंद्र पटेल यांनी हे सर्व विक्रम मोडत 156 जागा जिंकून नवा विक्रम नोंदवला आहे. हा गुजरातच्या इतिहासातील सर्वात मोठी निवडणूक विजय ठरला आहे.

विशेष म्हणजे, प्रचारसभेत पंतप्रधान मोदींनी नरेंद्रचा विक्रम भुपेंद्र मोडेल, असा विश्वास व्यक्त केला होता. निवडणुकीचा निकाल पाहता मोदींचे हे भाकीत खरे ठरले आहे. दरम्यान, या ऐतिहासिक विजयानंतर 12 डिसेंबर रोजी शपथविधी होणार आहे. गांधीनगर विधानसभेतील हेलिपॅड मैदानावर शपथविधी सोहळा होणार आहे. यावेळी पंतप्रधान मोदी, केंद्रीय गृहमंत्री अमित शाह उपस्थित राहणार आहेत.

गुजरातमधील 182 पैकी भाजपने 156 जागा जिंकल्या आहेत. 2017 च्या तुलनेत भाजपने 58 जागा अधिक जिंकल्या आहेत. तर काँग्रेसचे गत निवडणुकीच्या तुलनेत 60 जागांचे नुकसान झाले आहे. गतवेळी काँग्रेसने 77 जागा जिंकल्या होत्या यावेळी काँग्रेसला केवळ 17 जागांवर विजय मिळाला आहे.

या विजयानंतर पंतप्रधान नरेंद्र मोदी यांनी गुजरातच्या मतदारांचे आभार मानले आहेत. त्यांनी म्हटले आहे की, गुजरातचे धन्यवाद. लोकांनी विकासाच्या राजकारणाला आशिर्वाद दिला आहे. गुजरातच्या जनशक्तीसमोर मी शिर झुकवतो आहे. तर मुख्यमंत्री भुपेंद्र पटेल म्हणाले की, जनादेश स्पष्ट आहे. लोकांनी यावेळी ठरवले होते, त्यांना काय हवे आहे. दोन दशकांपासून सुरू असलेल्या गुजरातच्या विकास यात्रेला सुरू ठेऊ.