नवी दिल्ली: पंतप्रधान नरेंद्र मोदी यांनी स्वातंत्र्यदिनाच्या लाल किल्ल्यावरील भाषणामध्ये ‘बौद्धिक नक्षली’ असा उल्लेख केल्याने विरोधकांनी केंद्र सरकारवर टीकेचा भडीमार सुरू केला आहे. तर, सरकारने हा शब्दप्रयोग विरोधी नेत्यांना उद्देशून नव्हता, अशी सारवासारव केली आहे.

केंद्रीय संसदीय कामकाज मंत्री किरेन रिजीजू यांनी ‘एक्स’वर तीन मुद्द्यांची यादी देत, ‘बौद्धिक नक्षलीं’ची व्याख्या करण्याचा प्रयत्न केला आहे. मोदी यांनी त्यांच्या भाषणामध्ये नक्षलवादविरोधी मोहिमेचा उल्लेख करताना, ‘‘बौद्धिक नक्षलवाद्यांची ओळख पटवून त्यांना जनतेने रोखायला हवे,’’ असे आवाहन केले होते. त्यावर काँग्रेससह सर्वच विरोधी पक्षांनी टिका केली आहे. माजी गृहमंत्री पी. चिदंबरम यांनी ‘बौद्धिक नक्षलवादी असल्याचा मला अभिमान आहे’ असे विधान करत प्रत्युत्तर दिले आहे.

पंतप्रधानांचे ‘बौद्धिक नक्षली’ विधान हे निव्वळ राजकीय स्वरूपाचे वक्तव्य असल्याची टीका काँग्रेसचे राष्ट्रीय सरचिटणीस जयराम रमेश यांनी केली आहे. यापूर्वी जेव्हा सरकारमधील लोकांकडून राजकीय विरोधकांना शहरी नक्षली संबोधले होते, तेव्हा गृहमंत्री अमित शहा यांना अशी कोणतीही अधिकृत कायदेशीर व्याख्या अस्तित्वात नसल्याचे सांगावे लागले होते.

‘‘जातिनिहाय जनगणनेची मागणी करणाऱ्यांना सत्ताधाऱ्यांनी शहरी नक्षली म्हटले होते, त्यानंतर खुद्द सरकारने काही दिवसांनंतर स्वतः जातिनिहाय जनगणनेची घोषणा केली होती,’’ असे रमेश यांनी सांगितले. ‘मी आणि सर्व कॉक्रोचही ‘बौद्धिक नक्षली’ आहोत,’ अशी प्रतिक्रिया तृणमूल काँग्रेसच्या खासदार महुआ मोईत्रा यांनी दिली आहे.

तर, केवळ सरकारला प्रश्न विचारतात, म्हणून तुम्ही सुशिक्षित तरुणांना नक्षलवादी म्हणणार का, असा सवाल कॉक्रोच जनता पक्षाचा प्रवक्ता सौरभ दास याने केला.

पंतप्रधान नरेंद्र मोदी यांनी विरोधी पक्षांच्या नेत्यांना ‘बौद्धिक नक्षली’ असे म्हटलेले नाही, असे किरेन रिजीजू यांनी म्हटले आहे.

रिजीजू यांची ‘बौद्धिक नक्षलीं’ची व्याख्या

नक्षलवाद्यांना पाठिंबा देणारे आणि राज्यघटना नाकारणारे

फुटीरतावाद्यांच्या पाठिशी उभे राहणारे व ३७०व्या कलमाला पाठिंबा देणारे

ईशान्य भारत देशापासून वेगळा करण्यासाठी ‘चिकन नेक’पासून हा प्रदेश तोडण्याची इच्छा असणारे