जम्मू-काश्मीरच्या पहलगाममध्ये नुकत्याच झालेल्या भीषण दहशतवादी हल्ल्यामुळे भारत-पाकिस्तान संबंधांमध्ये पुन्हा एकदा तणाव निर्माण झाला आहे. या पार्श्वभूमीवर, कर्नाटक सरकारमधील गृहनिर्माण व अल्पसंख्याक कल्याण मंत्री बीझेड झमीर अहमद खान यांनी एक मोठ विधान केलंय. त्यांनी शेजारील पाकिस्तानविरुद्ध युद्ध करण्याची आणि बॉम्ब घेऊन तिथे जाण्याची तयारी दर्शवली आहे.

शुक्रवारी पत्रकारांशी बोलताना बीझेड झमीर अहमद खान म्हणाले, पाकिस्तान हा कायमचा भारताचा शत्रू राहिला आहे. जर पंतप्रधान नरेंद्र मोदी आणि केंद्रीय गृहमंत्री अमित शाह यांनी मला परवानगी दिली, तर मी युद्धासाठी पाकिस्तानात जाण्यास तयार आहे. मला आत्मघातकी बॉम्ब दिला गेला, तर मी तो अंगावर बांधून त्यांच्या देशात जाऊन हल्ला करीन.

त्यांनी पहलगाम येथे घडलेल्या दहशतवादी हल्ल्याचा तीव्र शब्दांत निषेध करत, त्याला "अमानवी आणि क्रूर" असे म्हटलं आहे. खान पुढे म्हणाले की, "हा हल्ला निष्पाप नागरिकांवर करण्यात आलेला घृणास्पद प्रकार आहे. प्रत्येक भारतीयाने आता एकत्र उभे राहणे गरजेचे आहे. केंद्र सरकारने राष्ट्रीय सुरक्षेसाठी कठोर निर्णय घ्यावेत.

२२ एप्रिल रोजी दहशतवाद्यांनी जम्मू-काश्मीरमधील पहलगाम येथे पर्यटकांच्या एका गटावर गोळीबार केला. या हल्ल्यात परदेशी पर्यटकांसह २६ जण ठार झाले, तर अनेक जण जखमी झाले. तपासात उघड झाले की, हल्लेखोरांनी हॉटेल्स आणि परिसराची रेकी करून ही कारवाई अंमलात आणली.

दहशतवाद्यांनी हल्ल्यापूर्वी पर्यटकांना धर्म ओळखण्यासाठी त्यांचे कपडे उतरवण्यास भाग पाडले. हिंदू ओळखल्या गेलेल्या पुरुषांवर थेट गोळीबार करण्यात आला. त्यांना वाचवण्याचा प्रयत्न करणाऱ्यांनी ठार मारण्यात आले.

या भयानक घटनेनंतर भारत सरकारने पाकिस्तानविरुद्ध कठोर भूमिका घेतली असून, सिंधू जल करार रद्द करण्याचा निर्णय घेतला आहे. तसंच पाकिस्तानच्या विमान कंपन्यांसाठी भारतीय हवाई क्षेत्र बंद करण्यात आलं आहे.

त्यानंतर पाकिस्तानने देखील भारतासोबतचा व्यापार थांबवला असून, भारतीय विमानांसाठी आपले हवाई क्षेत्र बंद केलं आहे.