Farooq Abdullah: जम्मू-काश्मीरचे माजी मुख्यमंत्री आणि नॅशनल कॉन्फरन्सचे खासदार फारुख अब्दुल्ला यांनी पुन्हा एकदा आपल्या वक्तव्यामुळे चर्चेत आले. त्यांनी भारत सरकारला शेजारील देश पाकिस्तानशी चर्चा करण्याचे आवाहन केले आहे. याशिवाय, चर्चेला होणाऱ्या विलंबाबाबतही त्यांनी मोदी सरकारला धारेवर धरले. यावेळी त्यांनी 'आमचीही अवस्था गाझासारखी होईल' असा इशाराही दिला.

मंगळवारी अब्दुल्ला म्हणाले की, 'अटल बिहारी वाजपेयीजी म्हणाले होते की मित्र बदलता येतात, पण शेजारी बदलता येत नाहीत. आपण आपल्या शेजाऱ्यांशी मैत्रीपूर्ण राहिलो तर दोघांचीही प्रगती होईल.' सध्या युद्ध हा पर्याय नाही आणि हे प्रकरण चर्चेने सोडवले पाहिजे, असेही पंतप्रधान मोदी म्हणाले होते.

ते पुढे म्हणाले की, 'संवाद कुठे आहे? नवाझ शरीफ (पाकिस्तानचे) पंतप्रधान होणार आहेत आणि ते म्हणतात की आम्ही (भारताशी) चर्चेसाठी तयार आहोत. पण आपण वाटाघाटी करायला तयार नाही याचे कारण काय? जर चर्चेतून तोडगा निघाला नाही तर आपलीही परिस्थिती गाझा आणि पॅलेस्टाईनसारखी होईल, ज्यावर इस्रायल बॉम्ब हल्ले करत आहे...'

विशेष म्हणजे, अब्दुल्ला यांचे हे वक्तव्य अशा वेळी आले आहे जेव्हा नुकतेच पूंछमध्ये भारतीय लष्कराचे पाच जवान शहीद झाले. याशिवाय, बारामुल्ला येथील एका निवृत्त पोलीस अधिकाऱ्याला मशिदीमध्येच गोळ्या घालण्यात आल्या. एवढेच नाही तर जवानांकडून चौकशी केल्यानंतर तीन नागरिकांचाही मृत्यू झाला होता.

पाकिस्तानमध्ये निवडणुका

पाकिस्तानच्या निवडणूक आयोगाने नुकतेच निवडणुकीचे वेळापत्रक जाहीर केले आहे. 8 फेब्रुवारी 2024 रोजी देशात निवडणुका होणार आहेत. सध्या, ECP उमेदवारांनी दाखल केलेल्या नामनिर्देशनपत्रांची तपासणी करत आहे. ही प्रक्रिया 30 डिसेंबरपर्यंत सुरु राहणार आहे. नामनिर्देशनपत्रांवरील दावे आणि हरकती 3 जानेवारीपर्यंत दाखल करता येतील आणि 10 जानेवारीपर्यंत निर्णय घेतला जाईल. आयोग 11 जानेवारीला उमेदवारांची यादी प्रसिद्ध करणार आहे.