भारतात तीन गोष्टी अत्यंत लोकप्रिय आहेत त्या म्हणजे सिनेमा, राजकारण आणि क्रिकेट. विशेषतः क्रिकेट हा देशात केवळ खेळ न राहता एक धर्मच बनला आहे. आयपीएलसारख्या भव्य स्पर्धांपासून ते विविध राज्यांच्या टी-20 लीग्सपर्यंत, देशभरात क्रिकेटची एक न संपणारी उत्सुकता पाहायला मिळते. आता याच यादीत ओडिशाचाही समावेश होणार आहे.

ओडिशा क्रिकेट असोसिएशनने (OCA) ओडिशा प्रो टी20 लीग सुरू करण्याची अधिकृत घोषणा केली आहे. ही लीग सप्टेंबर 2025 मध्ये खेळवली जाणार असून एकूण 6 संघ यात सहभागी होणार आहेत.

युवा खेळाडूंना संधी मिळणार
ओसीएने स्पष्ट केले आहे की ही लीग तयार करण्यामागचा उद्देश, राज्यातील उदयोन्मुख क्रिकेटपटूंना दर्जेदार प्लॅटफॉर्म उपलब्ध करून देणे हाच आहे. यामध्ये खेळाडूंना उच्च दर्जाची स्पर्धा, अनुभवी खेळाडूंशी खेळण्याची संधी, आणि राष्ट्रीय निवडकर्त्यांच्या नजरेत येण्यासाठी योग्य व्यासपीठ मिळणार आहे.

"देशांतर्गत क्रिकेटमध्ये एक शक्ती बनेल" - संजय बेहरा

ओडिशा क्रिकेट असोसिएशनचे सचिव संजय बेहरा यांनी सांगितले, "आमचा विश्वास आहे की ओडिशा प्रो टी20 लीग ही भारतीय देशांतर्गत क्रिकेटमध्ये एक प्रमुख शक्ती म्हणून उदयास येईल."

त्यांनी पुढे सांगितले की, लीगमध्ये सहभागी होण्यासाठी फ्रँचायझींना संधी दिली जाणार असून, यासाठी ‘अभिव्यक्ती स्वारस्य’ (EOI) दस्तऐवज 7 ते 13 जुलै या कालावधीत ओसीएच्या अधिकृत वेबसाइटवरून डाउनलोड करता येतील.

ओसीएने स्पष्ट केले आहे की फ्रँचायझी वाटप ही प्रक्रिया गुणवत्तेवर आधारित असेल आणि संपूर्ण पारदर्शकतेसह राबवली जाईल. यामुळे राज्यातील क्रिकेट अधिक मजबूत होण्याची अपेक्षा आहे.