Gujarat Election: गुजरात विधानसभा निवडणूक मतदानाची तारीख जसजशी जवळ येत चालली आहे, तसतसे येथे राजकीय तापमान वाढू लागले आहे. आता नवसारी विधानसभा मतदारसंघातील 18 गावातील लोकांनी सर्वच पक्षांची चिंता वाढवून ठेवली आहे. या गावांमध्ये सत्ताधारी भाजपसह इतर पक्षांच्या नेत्यांना गावबंदी केली आहे.

(Navsari Assembly constituency)

या 18 गावातील ग्रामस्थांनी मतदानावर बहिष्काराचा निर्णय घेतला आहे. त्यांनी गावात सर्व पक्षीय नेत्यांना बंदी घातली आहे. त्यामुळे कुठल्याही पक्षाला या गावांमध्ये प्रचार करता येत नाहीय. या ग्रामस्थांची एक मागणी खूप दिवसांपासून प्रलंबित आहे. ग्रामस्थ आंचेली येथे रेल्वे स्थानकावर लोकल ट्रेन थांबविण्याची मागणी करत आहे.

पण ही मागणी पुर्ण केली गेलेली नाही. त्यामुळे हे ग्रामस्थ नाराज आहेत. या स्थानकावर आणि इतर रेल्वे स्थानकांवरही ग्रामस्थांनी बॅनर लावले आहेत. ट्रेन नाही तर मत नाही, असा इशाराच या बॅनरवरून दिला आहे.

काय म्हणणे आहे ग्रामस्थांचे?

ग्रामस्थ म्हणताहेत की, रेल्वे स्थानकावर लोकल ट्रेन थांबवली जात नसल्याने अनेक अडचणी येतात. एखाद्या व्यक्तीला दुसऱ्या ठिकाणी जाण्याासाठी किमान 300 रूपये लागतात. गावातील विद्यार्थ्यांना शिक्षणासाठीही अडचणी येत आहेत. त्यांना कॉलेजला जायला विलंब होतो. विशेष कोरोना महारोगराईपुर्वी येथे रेल्वे स्थानकावर लोकल ट्रेन थांबत होत्या. आता सर्वकाही पुर्ववत झालेले असतानाही येथे लोकल ट्रेन थांबत नाही आहेत. त्यामुळे येथे लोकल ट्रेन थांबवली नाही तर मतदानादिवशी कुणीही मतदान करण्यासाठी जाणार नाही.