महाराष्ट्रात सुरू असलेल्या राजकीय उलथापालथीच्या पार्श्वभूमीवर मुंबई पोलिसांनी नुपूर शर्माला (Nupur Sharma) पुन्हा समन्स बजावले आहे. मुंबईतील पायधुनी पोलीस ठाण्यातून भाजपमधून निलंबित करण्यात आलेल्या नुपूर शर्माला दुसऱ्यांदा चौकशीसाठी नोटीस पाठवण्यात आली आहे. यापूर्वी 25 जून रोजी त्यांना पायधुनी पोलीस ठाण्यात चौकशीसाठी बोलावण्यात आले होते. मात्र त्यांच्याकडून या नोटीसला उत्तर न मिळाल्याने पायधुनी पोलीस ठाण्याने दुसऱ्यांदा समन्स पाठवले आहे.

विशेष म्हणजे प्रेषित मोहम्मद यांच्या विरोधात वादग्रस्त वक्तव्य केल्याप्रकरणी नुपूर शर्मा यांच्याविरोधात ही नोटीस जारी करण्यात आली आहे. एका टीव्ही चॅनलमधील डिबेट शो दरम्यान भाजपच्या प्रवक्त्या नुपूर शर्माने पैगंबर मोहम्मद यांच्या विरोधात आक्षेपार्ह वक्तव्य केले होते. ज्यावर देशातूनच नव्हे तर परदेशातूनही टीका होताना दिसत होती. त्याचवेळी भारतातही हिंसक निदर्शने पाहायला मिळाली.

नुपूर शर्मा यांच्या वक्तव्यावरून गदारोळ सुरू असताना भाजपने त्यांना निलंबित केले. यानंतर नुपूर शर्माने एक वक्तव्य जारी करत माफी मागितली आहे. नुपूर शर्मा यांच्या वक्तव्याच्या निषेधार्थ शुक्रवारी देशातील अनेक शहरांमध्ये लोक रस्त्यावर उतरले आणि यादरम्यान हिंसाचाराच्या घटना घडल्या. आंदोलक नुपूर शर्माच्या अटकेची मागणी करत होते.