Mrunal Thakur Reply To Bipasha Basu Controversy

मुंबई – बॉलिवूड अभिनेत्री मृणाल ठाकूर सध्या सोशल मीडियावर चर्चेत आली आहे. काही दिवसांपूर्वी तिचा एक जुना व्हिडिओ व्हायरल झाला, ज्यामध्ये तिने अभिनेत्री बिपाशा बासूच्या शरीराबद्दल केलेली टिप्पणी वादग्रस्त ठरली.

हा व्हिडिओ मृणाल फक्त १९ वर्षांची असताना दिलेल्या एका मुलाखतीचा असल्याचं सांगितलं जात आहे. त्यात तिने बिपाशाच्या शरीरयष्टीविषयी बोलताना तिच्या मसल्सचा उल्लेख केला आणि बॉडीशेमिंग केल्याचं नेटकऱ्यांना वाटलं. याशिवाय, स्वतःला बिपाशापेक्षा सुंदर असल्याचे वक्तव्यही तिने केले होते. या वक्तव्यामुळे नेटकऱ्यांकडून तिच्यावर मोठ्या प्रमाणात टीका सुरू झाली.

जुना व्हिडिओ व्हायरल झाल्यानंतर सोशल मीडियावर मृणालविरोधात संतापाची लाट उसळली. अनेकांनी तिच्या वक्तव्याला ‘अभिनेत्रीला शोभणारं नाही’ अशी टीका केली. वाढत्या ट्रोलिंगच्या पार्श्वभूमीवर अखेर मृणाल ठाकूरने आपली भूमिका स्पष्ट करत जाहीर माफी मागितली.

मृणालने आपल्या इन्स्टाग्राम स्टोरीमध्ये लिहिले – "मी १९ वर्षांची असताना अनेकदा काही गोष्टी बोलून गेले. त्या वेळी माझ्या शब्दांचे किती महत्त्व असू शकते किंवा अगदी गंमत म्हणून वापरलेले शब्दही कोणाला किती दुखावू शकतात, हे मला कळलं नव्हतं. आता मात्र मला त्याचं गांभीर्य समजलं आहे आणि मी त्याबद्दल मनापासून माफी मागते."

तिने पुढे लिहिलं – "माझा हेतू कधीच कोणाचा अपमान करण्याचा नव्हता. मात्र आता अनुभवाने समजलं आहे की, सौंदर्य आणि आकर्षण अनेक प्रकारांनी व्यक्त होतं. प्रत्येक व्यक्तीची स्वतःची वेगळी ओळख आणि व्यक्तिमत्त्व असतं, जी आदराने स्वीकारायला हवी."

मृणालच्या या जाहीर माफीनंतर बिपाशा बासूच्या चाहत्यांचा आणि नेटकऱ्यांचा रोष काही प्रमाणात कमी होण्याची शक्यता आहे.